O valo

     Para conmemorar a data de hoxe, Día da Paz, a coordinadora dos Clubs de Lectura propón para 1º ESO a obra “O valo”, de Carlos Labraña. 

"No medio do deserto, o Soldadiño de Chumbo, un neno soldado, chanta unha bandeira e coloca un valo de arame xusto onde o mapa marca a fronteira. Do outro lado do valo, Sahara, unha rapaza que foxe da guerra, trata de convencelo de que a deixe pasar, xa que está procurando un pozo onde saciar a súa sede. Peza dun único lance para dous personaxes coa guerra de Siria como pano de fondo, “O valo” propón unha emocionante reflexión sobre a igualdade e a paz entre todas as persoas e comunidades."

Sinopse publicada por Editorial Xerais

      Durante as vindeiras xuntanzas do club faremos unha lectura dramatizada, na que o alumnado caracterizarase interpretando os personaxes da obra.

Lecturas de Miserábeis

      Este curso retomamos no centro Miserábeis. O Musical, un proxecto de carácter interdisciplinario baseado na obra de Víctor Hugo, no que a nosa Comunidade Educativa traballou con grande dedicación durante os cursos 18/19 e 19/20. En marzo de 2020 a pandemia impediu a súa continuidade e agora o claustro do centro aprobou poñelo novamente en marcha, facendo partícipe ao alumnado, profesorado, persoal non docente, nais e pais do IES Illa de Ons. 

     Desde a biblioteca seleccionáronse tres adaptacións da obra mestra de Víctor Hugo para a súa lectura nos grupos de 2º ESO, 3º ESO e 4º ESO. Deste xeito facilitarase ao alumnado coñecer mellor a historia de Jean Valjean e dos personaxes das distintas clases sociais que o rodean na Francia do século XIX.

Microrrelatos

 O alumnado de 2º ESO traballou na materia de Lingua Galega o microrrelato. A continuación podedes ver unha selección dos textos acompañados con imaxes.

Campionato de xadrez

     A partir do día 31 de xaneiro, durante os mércores do resto do trimestre, celebraremos na biblioteca do centro un campionato de xadrez. Todo o alumnado, profesorado e persoal  non docente interesado en participar, pode pasar pola biblioteca para anotarse antes desa data.

PRÓXIMAS PARTIDAS:

CLASIFICACIÓN:

Visita ao Museo Massó

     O pasado 12 de xaneiro o alumnado de 1º ESO visitou o Museo Massó en Bueu. Nas distintas salas de exposicións descubrimos a orixe do museo e explicáronnos o funcionamento de varios instrumentos e obxectos curiosos de navegación, quedamos abraiados coas impresionantes maquetas de barcos e as pedras litográficas coas que estampaban os deseños nas latas da conserveira e marabillounos a valiosa colección de libros antigos de temática naval, algúns deles incunables.

     Ademais participamos nun obradoiro práctico de nós mariñeiros básicos: cote, as de guía, oito, ballestrinque... e puidemos elaborar un chaveiro de bóla moi chulo.