Mondra. Cando menos a memoria.

     Nesta semana de celebración das Letras Galegas, o departamento de Música do noso centro organizou un obradoiro impartido polo artista Mondra, que conseguiu achegar o folclore galego á rapazada dunha maneira dinámica e divertida.

     O artista explicou ao alumnado que eran as foliadas ou seráns que celebraban os nosos bisavós e bisavoas, eses lugares onde a xente se reunía para bailar, cantar e socializar. Falou dos distintos instrumentos musicais utilizados e contextualizou estas tradicións como parte fundamental da vida rural galega, destacando o importante papel das mulleres na conservación da música popular a través dos instrumentos tradicionais e das cantigas.

     A continuación chegou o momento de bailar. O alumnado organizouse en dúas filas enfrontadas para aprender os pasos básicos dun solto (en contraposición ao agarrado) e pouco a pouco deixáronse levar polo ritmo da muiñeira.

     Durante a actividade Mondra luciu unha camiseta co texto “Cando menos a memoria”, unha referencia á importancia da memoria e da identidade colectiva, como o propio labor de recuperación cultural que el mesmo desenvolve no seu traballo artístico. 

     Moitas grazas pola túa achega á nosa identidade como pobo!

Letras Galegas 26

    Un ano máis celebramos as Letras Galegas no IES Illa de Ons cunha serie de actividades arredor da figura homenaxeada, nesta ocasión a xornalista e escritora Begoña Caamaño.

     Na entrada do centro organizouse unha exposición cos carteis gañadores no certame anual proposto pola Xunta, elaborados polo alumnado do IES Castelao de Vigo, e rodeados este ano de certa polémica polo que os autores consideran un acto de censura nun dos seus carteis por parte da Secretaría Xeral da Lingua. “De Circe a Morgana” é unha mostra que nos achega á vida, á obra e ao contexto histórico e cultural da escritora e xornalista galega. A exposición complétase coa guía didáctica sobre a autora, tamén elaborada por este centro educativo, que serve de apoio para coñecer mellor o legado de Begoña Caamaño.

     Ademais, a biblioteca ampliou os seus fondos con dúas publicacións arredor da autora: Begoña ou o pracer da amizade, de Beatriz Maceda, e Os fíos de Begoña, de Eva Mejuto, dúas lecturas moi recomendables para afondar tanto na súa traxectoria literaria como na súa dimensión humana.

     Por outra banda, as “Pingas Musicais” desta semana para os intercambios de clase tiveron un marcado selo galego. Ao longo destes días soaron artistas como Dios Ke Te Crew, Ses, García MC ou Mondra, achegando ao alumnado diferentes estilos e voces da música actual en galego.

     E precisamente falando de Mondra, temos a sorte de contar coa súa presenza no noso centro a vindeira semana nunha actividade organizada para gozar da música, da creación contemporánea e da lingua galega en directo. Estamos desexando que chegue o día!

Miserábeis na MOTESMO

     O noso centro participou o pasado martes na MOTESMO (Mostra de Teatro no Ensino Secundario do Morrazo) coa obra Miserábeis. O Musical, unha montaxe que emocionou ao público grazas ao compromiso, á entrega e ao enorme traballo realizado tanto polo alumnado coma polo persoal docente e non docente implicado no proxecto.

     Esta adaptación da obra de Víctor Hugo, que xa foi representada anteriormente en escenarios de Cangas, Bueu e Pontevedra, consolídase como unha proposta artística e educativa de grande impacto e constitúe unha firme aposta pola educación en igualdade mediante unha aprendizaxe cooperativa e interdisciplinar. Ao longo da representación trátanse cuestións como as liberdades, as desigualdades sociais, a coraxe, a revolución ou a defensa dos dereitos das mulleres.

     Desde o IES Illa de Ons queremos felicitar a todas as persoas que formaron parte desta experiencia e agradecer a excelente acollida do público. A participación na Motesmo supón unha oportunidade para compartir cultura, crear comunidade e seguir demostrando o grande potencial educativo e humano do teatro.