Premios II Certame de Fotografía

     A pasada semana, o xurado do II Certame de Fotografía Obxectivo Bueu formado por membros da Biblioteca, do Equipo de Dinamización da Lingua e da ANPA, decidiron as fotografías gañadoras desta segunda edición do concurso.

     Os autores e autoras das tres mellores fotografías serán premiados cunha ampliación das imaxes seleccionadas. As seis mellores imaxes obterán como premio un curso de perfeccionamento de fotografía.

Premiados/as cunha ampliación fotográfica e co curso de fotografía

“A arte non entende o vacío” de Antía Novas (3º ESO A)

Interior da factoría baleeira de Massó, Cangas.

"Ruínas" de Abel Dopazo (3º ESO B)

Capela de San Lourenzo de Chans, Bueu. 

"Castelo" de María Méndez (3º ESO B)

Leira dos Condes (Bosque Encantado), Aldán.

Premiado e premiadas co curso de fotografía

“Refuxio de pastores” de Manuel Gámez (1º ESO B)

Cabo Udra, Bueu.

“Massó, lugar de traballo abandoado” de Iria Villanueva (4º ESO B)

Exterior da factoría baleeira de Massó, Cangas.

"O Santo do Mar" de Maica Morgado (2º ESO B)

Praia do Santo, Marín.

Noraboa a todos e todas!

    Á volta da vindeira semana de vacacións terá lugar un acto no que se fará entrega, aos autores e autoras das distintas fotografías, dunha certificación pola súa participación.

Recital poético sobre Emma Pedreira

     O sábado 30 de marzo ás 12:00 h. terá lugar, na Sala Amalia Domínguez Búa de Bueu, un recital poético sobre a escritora galega Emma Pedreira, gañadora do premio Johan Carballeira de poesía nos anos 1998 e 2000.

    
     Grazas a Daniel Chapela, da Axencia de Lectura de Meiro, tivemos a sorte de dispoñer na biblioteca do noso centro dunha ampla selección da obra desta escritora.

     
     Moitas grazas!

Salón do Libro Infantil e Xuvenil de Pontevedra

     Unha ano máis abre as súas portas o Salón do Libro Infantil e Xuvenil no Pazo da Cultura de Pontevedra. Exposicións, rutas, contacontos, obradoiros, teatro e espectáculos musicais serán de novo os protagonistas nesta XX edición que, a través da temática da revolución, pretende achegar á mocidade a reflexión e o pensamento crítico.
      O Salón permanecerá aberto desde o 22 de marzo ata o 12 de abril no seguinte horario:

• De luns a xoves: De 17.00 a 20.00 h.

• Os venres: De 17.00 a 20.30 h. 
  

• Os sábados e domingos: De 11.00 a 14.00 e de 17.00 a 20.30 h.

• O Recinto Feiral, ademais, abre sábado e domingo todo o día.

     Recorda que algunhas das actividades requiren inscrición previa. Consulta o programa completo na imaxe seguinte.

Club de lectura e xogos co CEIP Torre-Cela

     O alumnado de 1º da ESO A do club de lectura "Ons, a illa do tesouro" recibimos o pasado venres ao alumnado do club de lectura CEIP Torre-Cela, acompañados da súa profesora Sandra. Comemos todos xuntos e logo xogamos no patio, nun día espléndido, ao "Bull-dog", "O pobo dorme" e ao "Catapún, chimpún". Na biblioteca, Antía (3ºA) e Noel (1ºA) -facendo estupendamente un papel feminino- representaron unha breve peza teatral sobre os problemas das parellas de adolescentes. Despois, unha parte do alumnado de 1ºA leu unha peza teatral creada á súa medida para reflectir as relacións entre eles e dentro do centro. Unha xornada realmente divertida que resumimos neste vídeo, editado por Ariadna Domínguez a partir das imaxes gravadas por Gabriel e Laura.

Conmemoración do 8 de Marzo

     O Concello de Bueu e o Centro de Información ás Mulleres (CIM) organizaron para o día de hoxe un acto co fin de conmemorar o Día Internacional da Muller. O noso centro foi o encargado de inauguralo cunha actuación baseada no musical Miserábeis, adaptada á revolución feminista. Esta posta en escena supón unha mostra do proxecto colaborativo e interdisciplinar sobre a obra de Víctor Hugo que estamos a levar a cabo no noso centro desde o inicio de curso e que representaremos publicamente ao remate deste.

      Ademais desta representación, tivo lugar a entrega dos premios correspondentes ao concurso "A igualdade no traballo" nas modalidades de ilustración e literatura. Antía Novas Arribas, alumna de 3º ESO A do noso centro, foi premiada no certame literario pola súa biografía de Christine de Pizan. Noraboa!

Fotografía dos participantes na actuación cos premiados e premiadas nos dous certames.

     

     Deixámosvos cun fragmento da Declaración dos Dereitos da Muller e da Cidadá, redactada por Olympe de Gouges en 1791.

Home, es quen de ser xusto?

1. A muller nace libre e permanece igual ao home en dereitos. 
2.  O obxectivo de toda asociación política é a conservación dos dereitos naturais e imprescriptibles da Muller e do Home; estes dereitos son a liberdade, a propiedade, a seguridade e, sobre todo, a resistencia á opresión. 
3.  O principio de toda soberanía reside esencialmente na Nación que non é máis que a reunión da Muller e o Home: ningún corpo, ningún individuo, pode exercer autoridade que non emane deles. 
4. A liberdade e a xustiza consisten en devolver todo o que pertence aos outros; así, o exercicio dos dereitos naturais da muller só ten por límites a tiranía perpetua que o home lle opón; estes límites deben ser corrixidos polas leis da natureza e da razón. 
5. As leis da natureza e da razón prohiben todas as accións prexudiciais para a Sociedade: todo o que non estea prohibido por estas leis, prudentes e divinas, non pode ser impedido e ninguén pode ser obrigado a facer o que elas non ordenan. 
6. A lei debe ser a expresión da vontade xeral; todas as Cidadás e Cidadáns deben participar na súa formación persoalmente ou por medio dos seus representantes. Debe ser a mesma para todos; todas as cidadás e todos os cidadáns, por ser iguais aos seus ollos, deben ser igualmente admisibles a todas as dignidades, postos e empregos públicos, segundo as súas capacidades e sen máis distinción que a das súas virtudes e os seus talentos. 
7. Ningunha muller pode ser eximida de ser acusada, detida e encarcerada nos casos determinados pola Lei. As mulleres obedecen como os homes a esta Lei rigorosa. 
8. A Lei só debe establecer penas estritas e evidentemente necesarias e ninguén pode ser castigado máis que en virtude dunha Lei establecida e promulgada anteriormente ao delito e legalmente aplicada ás mulleres. 
9. Sobre toda muller que fose declarada culpable caerá todo o rigor da Lei. 
10.  Ninguén debe ser molestado polas súas opinións incluso fundamentais; se a muller ten o dereito de subir ao cadalso, debe ter tamén igualmente o de subir á Tribuna con tal que as súas manifestacións non alteren a orde pública establecida pola Lei. 
11. A libre comunicación dos pensamentos e das opinións é un dos dereitos máis preciosos da muller, posto que esta liberdade asegura a lexitimidade dos pais con relación aos fillos. Toda cidadá pode, pois, dicir libremente, son nai dun fillo que vos pertence, sen que un prexuízo bárbaro a force a disimular a verdade; coa excepción de responder polo abuso desta liberdade nos casos determinados pola Lei. 
12.  A garantía dos dereitos da muller e da cidadá implica unha utilidade maior; esta garantía debe ser instituida para vantaxe de todos e non para utilidade particular daquelas a quen é confiada. 
13. Para o mantemento da forza pública e para os gastos de administración, as contribucións da muller e do home son as mesmas; ela participa en todas as prestacións persoais, en todas as tarefas penosas, por tanto, debe participar na distribución dos postos, empregos, cargos, dignidades e outras actividades. 
14. As Cidadás e Cidadáns teñen o dereito de comprobar, por si mesmos ou por medio dos seus representantes, a necesidade da contribución pública. As Cidadás unicamente poden aprobala se se admite unha repartición igual, non só na fortuna senón tamén na administración pública, e se determinan a cota, a base tributaria, a recadación e a duración do imposto. 
15. A masa das mulleres, agrupada coa dos homes para a contribución, ten o dereito de pedir contas da súa administración a todo axente público. 
16. Toda sociedade na que a garantía dos dereitos non estea asegurada, nin a separación dos poderes determinada, non ten constitución; a constitución é nula se a maioría dos individuos que compoñen a Nación non cooperou na súa redacción. 
17. As propiedades pertencen a todos os sexos reunidos ou separados; son, para cada un, un dereito inviolable e sagrado; ninguén pode ser privado dela como verdadeiro patrimonio da natureza a non ser que a necesidade pública, legalmente constatada, esíxao de maneira evidente e baixo a condición dunha xusta e previa indemnización.

Entroido 2019

     O venres 1 de marzo celebramos o entroido no IES Illa de Ons. Ademais dun concurso de disfraces por grupos houbo karaoke e os certames habituais de elaboración de doces típicos desta época e de caretas e cabezudos.

     Os traballos premiados no concurso de caretas e cabezudos foron os seguintes:

 

Primeiros premios

 Antía Novas Arribas (3ºA)

Ariadna Domínguez Cabanelas (1ºA)

Lois Carracelas Mayo (1ºA)

Segundos premios

 Zulema González Nores (1ºA)

Breixo Freire Álvarez (1ºB)

Noemí Fernández Barcia (1ºB)

Terceiros premios

Brais Castro Cabaleiro (1ºB)

Noel Martínez Parada (1ºA)

Saúl Cancelas Estévez (1ºB)

Noraboa a todos e todas pola calidade dos traballos presentados!

     Recordade que o entroido en Bueu continúa. Consulta o programa de actividades na seguinte imaxe.

II Certame de fotografía OBXECTIVO BUEU

     Un ano máis a Biblioteca do noso centro, en colaboración coa ANPA e o Equipo de Dinamización Lingüística, promoverá varios concursos dirixidos ao alumnado do IES Illa de Ons.

     Aquí tedes o cartel promocional e as bases do primeiro deles, o II Certame de fotografía OBXECTIVO BUEU. 

       Animádevos a participar!

Rosalía e os dereitos das mulleres

     

Ilustración da artista Abi Castillo

    

     Tal día como hoxe no ano 1837 nace Rosalía de Castro, unha das máis importantes poetisas da literatura do século XIX, figura destacada do Rexurdimento galego e unha defensora temperá dos dereitos das mulleres. No artigo Las literatas Rosalía aborda os prexuízos sociais que dificultan que as mulleres se dediquen a tarefa literaria e deféndese das acusacións dalgúns, aclarando que é ela mesma quen escribe as súas obras, e non o seu marido, Manuel Murguía.

    

      Mañá no noso centro terá lugar un acto homenaxe a Rosalía, organizado polo profesor de Lingua e Literatura Galega Anxo Rajó e coa participación do alumnado de 3ºA e 4ºC.

ACTIVIDADE HOMENAXEANDO A ROSALÍA

Visita dos "Belulectores"

     O club de lectura de 1ºB recibiu o pasado venres ao alumnado do club de lectura de 6º do CEIP Montemogos que veu acompañado por Mª José, profesora que coordina a biblioteca deste centro de Beluso.

    Despois de comer, tanto a rapazada como as profes xogaron a "Catapúm Chimpúm" e "Bulldog", e algún que outro improvisou pasos de baile máis que modernos. A continuación, na biblioteca, repetimos as actividades da xuntanza da pasada semana co club de lectura de 1ºA co CEIP A Pedra: Antía e Carla de 3ºA fixeron unha dramatización da peza teatral Mándame un Whatsapp e o alumnado de 1ºB leu a obra Misterio no Instituto, pero nesta ocasión coa colaboración de Antón, o director do centro, que fixo unha interpretación de si mesmo.

     Na seguinte ligazón BIBLIOMONTEMOGOS podedes ver algunhas das imaxes que publicaron os nosos invitados.
     Xa sabedes, cando queirades repetimos!

Club de lectura compartido

     O pasado venres o club de lectura de 1º ESO A tivo uns invitados moi especiais, o voluntariado da Biblioteca do CEIP A Pedra, que visitaron o noso centro para compartir unha tarde de xogos e lecturas.

     Os rapaces e rapaces, acompañados polas súas profesoras Lina e Macu, achegáronse ao noso centro e, despois de comer no patio, divertímonos cos xogos organizados por Sabela, profesora de inglés do IES Illa de Ons. A continuación trasladámonos á biblioteca onde as alumnas Antía e Carla (de 3º ESO) fixeron unha lectura dramatizada da pequena peza teatral Mándame un Whatsapp de Fernando J. López (incluída na obra El tamaño no importa. Textos breves de aquí y de ahora - IV). Ademais, alumnos e alumnas de 1º ESO A interpretaron unha pequena obra de teatro, protagonizada por eles mesmos e escrita pola profesora Lourdes Garrido, coordinadora dos clubs de lectura. Finalmente compartimos algunhas risas coas imitacións e interpretacións improvisadas que realizaron rapaces e rapazas dos dous centros.

     Agardámosvos novamente cando queirades!

VII Certame de relato curto

      Unha nova edición, a sétima, do certame literario de relato curto da FANPA (Federación de ANPA de centros públicos da provincia de Pontevedra), está en marcha.

     As bases do certame e o seguimento do calendario de entrega así como os relatos premiados e o libro publicado de cada edición están dispoñibles no web específico do VII Certame:
http://blogs.nontedurmas.org/certame/

       Os principais obxectivos deste certame son: fomentar a creatividade no alumnado, potenciar a expresión e comprensión escrita, estimular o uso do galego nas familias, facilitar as posibilidades de publicación a novos creadores/as, apoiar os escritores/as noveis e afeccionados/as, crear un espazo común e familiar para a creación literaria.

• Os relatos deberán ser orixinais, inéditos, non premiados noutros certames, de temática libre e escritos en lingua galega. Cando se promovan dende os colexios e institutos, serán descartados os grupos de relatos de temática semellante.
• Poderán presentarse todos os alumnos e alumnas dos centros públicos da provincia de Pontevedra de primaria, secundaria, bacharelato e formación profesional. Tamén poderán presentarse as persoas adultas (familiares, profesorado e alumnado universitario dos campus de Pontevedra e Vigo).
• Cada autor/a só poderá presentar un relato que terá unha extensión mínima de 200 palabras e máxima de 300. Estará escrito en Times New Roman, de tamaño 12 pt. e interliñado de 1,5 liñas.
• O prazo de envío dos textos finalizará o 28 de febreiro de 2018.

CONSULTA AQUÍ AS BASES COMPLETAS 

Debuxando ao alén. Exposición interactiva

  A exposición interactiva de Ana Juan, Debuxando ao alén, aproxímanos ao universo creativo desta ilustradora e descúbrenos o proceso creativo de dous proxectos: Otra vuelta de tuerca e Snowhite. Ademais, preséntanos Erthaland, Snowhite’s Mystery Tale, unha aventura gráfica interactiva. Aquí poderemos mergullarnos no primeiro capítulo desta aventura e realizar unha visita virtual á contorna en que transcorre. Así mesmo, a realidade aumentada e unha recreación animada revélannos novos puntos de vista e múltiples detalles deste proxecto.

     Se queres facerte unha idea do proxecto antes de ir á exposición, achégate ata a Biblioteca do noso centro, temos a sorte de contar cunha pequena mostra do que alí  podemos descubrir. 

     Debuxando ao alén permanecerá aberta ata o día 24 de febreiro, na Sala de Exposicións do Pazo da Cultura de Pontevedra. A artista Itziar Ezquieta realizará visitas guiadas os domingos 10, 17 e 24 de febreiro ás 12:00h. A organización recomenda descargar previamente a aplicación "Ana Juan, dibujando al otro lado" nos teléfonos ou tabletas dos visitantes para mellorar a experiencia.

Voces de Bueu

     José Manuel Dopazo, presidente da Asociación Club Golfiños de Bueu, visitou o IES Illa de Ons o pasado venres para presentar o libro Voces de Bueu. Mosaico de vivencias, unha  obra que recolle 25 historias de xente desta vila, 5 de cada parroquia, nas que se amosa o xeito de vivir e de falar nos distintos lugares deste concello.

     Durante a presentación, tanto Dopazo como Xoán, profesor de Lingua e Literatura Galega do noso centro, leron algunhas das historias recollidas no libro.

O imaxinario do país

     Hoxe, venres 25 de xaneiro, ás 20:00 h. na sala de exposicións Amalia Domínguez Búa de Bueu, terá lugar a presentación da exposición fotográfica de Anxo Cabada titulada O imaxinario do país e a continuación celebrarase un recital poético.

     O sábado 26, as 20:00 h, presentarase o documental Vértice de versos sobre a traxectoria da literatura galega nos últimos anos.

      Ambos os dous actos son organizados pola Asociación de Veciños da Banda do Río, co apoio do Concello de Bueu, a Deputación de Pontevedra, Teatro Scenae, Librería Abrente e Librería Miranda.

Premios maratón fotográfico 2018

     A asociación de veciños da Banda do Río de Bueu entregou os premios do seu concurso de fotografía, celebrado o pasado  mes de decembro. O concurso disputouse en dúas categorías, unha xeral e outra infantil, que gañaron respectivamente Juan Fernández Varela e Ariadna Domínguez Cabanelas, alumna do noso centro. O acto oficial de entrega dos galardóns tivo lugar na sala Amalia Domínguez Búa no centro da vila, coa presenza da directiva deste colectivo, do deputado de Cultura Xosé Leal e do alcalde Félix Juncal.

 

     O certame, encadrado no marco do Ano da Lingua da Deputación, propoñía tres opcións para realizar as fotos: motivos relacionados coa lingua, a cabina telefónica de Montero Ríos como ferramenta de comunicación oral e o barrio en xeral.

Noraboa a Ari e aos demais participantes!

Convocatoria de Clubs de Lectura

     O 31 de decembro foi publicada a resolución definitiva da convocatoria de Clubs de Lectura para o curso 2018/2019. O noso centro leva participando nesta convocatoria estes últimos tres anos e cada vez son máis os rapaces e rapazas animados a formar parte dos clubs de lectura formados. 

Durante o 1º trimestre do curso realizáronse as seguintes actividades:

CLUB DE LECTURA DE 1º ESO:

• Venres 2 de novembro: lectura dramatizada de breves pezas da obra El tamaño no importa. Textos breves de aquí y de ahora (IV).
• Venres 23 de novembro: comezo da lectura dramática e caracterización dos personaxes de La Ratonera, de Agatha Christie, coa proxección previa do Book Trailer realizado o curso pasado.

CLUB DE LECTURA DE 2º ESO:

• Xoves 16 de novembro: lectura dramatizada de breves pezas da obra El tamaño no importa. Textos breves de aquí y de ahora (IV).

CLUB DE LECTURA DE 3º ESO:

• Mércores 31 de outubro: lectura da obra teatral Farsa Plautina, de Agustín Magán, para preparar a lectura de La Celestina, que será a lectura monográfica durante o 2º e 3º trimestre.

• Mércores 21 de novembro: lectura dramatizada de breves pezas da obra El tamaño no importa. Textos breves de aquí y de ahora (IV) e representación de tres deses pezas no acto organizado o luns 26 de novembro no noso centro para conmemorar o Día Internacional Contra a Violencia de Xénero.

• Mándame un Whatsapp de Fernando J. López.
• Interpretada por Antía e Carla.
• Masculino y Femenina de Pilar Zapata.
• Interpretada por Gisela, Alba, Sara e Víctor.
• Pareja con tenedor de Jesús Campos.
• Interpretada por Santi e Paula. 

Se non vou nun bou...

     Mañá comezan a navegar as novas maletas viaxeiras: coloridas bibliotecas móviles cheas de libros, filmes e música, que botarán amarras nas casas do noso alumnado, para que poidan gozar co seu contido en familia. Agardamos que sexan do voso agrado. 

Día Internacional dos Dereitos Humanos

  Os alumnos e alumnas de 1º ESO do noso centro participaron hoxe, xunto co alumnado dos outros centros educativos de Bueu, nos actos organizados pola Asociación de Veciños da Banda do Río e a Asociación de Alfombras Florais, con motivo da conmemoración do setenta aniversario da Declaración dos Dereitos Humanos da ONU.

     O acto consistiu na confección dunha alfombra duns sete metros de diámetro, con deseños seleccionados dos debuxos do concurso escolar sobre os Dereitos Humanos celebrado o pasado mes de setembro. A composición completouse cunha serie de figuras de papiroflexia, representando as esculturas da obra Universo iluminado do artista Cristóbal Gabarrón, creadas para celebrar o aniversario da ONU en 2015.

     Ademais, desde o concello fíxose unha lectura dos trinta dereitos humanos a cargo de diversos persoeiros, entre eles o ciclista Álvaro Pino, a poetisa Oriana Méndez, o cociñeiro Pepe Solla, a cantante Uxía Senlle, o ilustrador Marc Taeger ou Rosmy Gabarrón, a filla de Cristóbal Gabarrón. O alcalde de Bueu, Félix Juncal, foi o encargado de pechar o acto lendo o último dos 30 dereitos humanos.

     Deixámosvos cun vídeo que inclúe as prácticas de papiroflexia dos rapaces e un resumo dos actos do día de hoxe na Praza Massó de Bueu.

Calendario 2019

     Xa está aquí, xa chegou, o calendario do 2019!

     Recordades que o pasado mes de maio a Biblioteca, en colaboración coa ANPA, convocou un concurso de fotografía? Pois ben, este curso deseñamos varios calendarios utilizando as 12 imaxes gañadoras para ilustrar cada mes do ano. Se estades interesados/as en comprar un calendario de parede (tamaño A3), un de mesa ou un de bolsillo, poñédevos en contacto co alumnado de 2º, 3º ou 4º ESO. Cos cartos recadados custearán dúas saídas educativas propostas polo centro, a viaxe á neve e a viaxe de fin de estudos.

     Moitas grazas pola vosa colaboración.

Guías de lectura e música

     Un ano máis compartimos con todos e todas vós as guías de lectura elaboradas pola Coordinadora dos Equipos de Dinamización Lingüística do Morrazo. Podedes atopar nelas ideas para agasallar, tanto para os máis pequenos como para os maiores da casa.

 

CULTURGAL

Que é Culturgal?

Culturgal é a Feira das Industrias Culturais que se celebra anualmente na primeira semana de Decembro e que en 2018 chega a súa décimo primera edición do 30 de novembro ao 2 de decembro.

Que vou atopar?

Ademais de poder achegarte aos máis de 80 stands dedicados a libro, música, teatro, audiovisual, infantil, tecnoloxía e máis, Culturgal conta cun programa de ao redor de 120 actividades propias durante os 3 días: concertos, espectáculos familiares, encontros con escritores, estreas de filmes e moito máis. Todo nun recinto feiral de 4.875 metros cadrados.

Quen organiza Culturgal?

A asociación Culturgal, na que están integradas as seguintes asociacións gremiais: Asociación Galega de Editores, Escena Galega, Asociación Galega de Produtoras Independentes (AGAPI), Asociación Galega de Empresas Musicais (AGEM) e EGANET (Asociación de Empresas Galegas Adicadas a Internet e as Novas Tecnoloxías.

Onde e cando se celebra?

Culturgal 2018 celébrase no Pazo da Cultura de Pontevedra (Rúa Alexandre Bóveda s/n) do 30 de novembro ao 2 de decembro de 2018. A Feira ten horario ininterrumpido de 11:00h a 21:00h o venres e o sábado. O horario do domingo é de 11:00h a 20:00.

Como chego ao recinto de Culturgal?

Pazo da Cultura de Pontevedra

RUA ALEXANDRE BÓVEDA, S/N

36005 Pontevedra

986 833 061

www.pazodacultura.org

Ver: http://culturgal.com/informacion-util/como-chegar-a-culturgal/

CONSULTA AQUÍ A PROGRAMACIÓN 

Concurso fotográfico e maratón

     A Asociación de Veciños da Banda do Río convoca, para este domingo 2 de decembro, o Maratón Fotográfico 2018 de Bueu. Trátase dunha iniciativa creativa financiada baixo a convocatoria de Cultura 2018 Ano da Lingua da Deputación de Pontevedra que ten como temática a lingua.

     Poderán participar todos os interesados/as (os menores de idade terán que vir acompañados por un adulto). Establécense tres categorías:

• Infantil: para menores de 12 anos.
• Junior: de 12 a 18 anos.
• Senior: para maiores de 18.

     Os participantes serán convocados no entorno do Estaleiro de Purro, na Banda del Río, ás 10 da mañá. Alí se lles recordarán as bases do concurso, as condicións para a participación e se repartirán (e recollerán posteriormente) as follas de inscrición. A continuación darase un prazo de 5 horas para tomar as fotografías que respondan aos temas propostos (a lingua nas súas distintas manifestacións), cun máximo de 10 fotos finais a concurso para cada participante.

     Na seguinte ligazón podedes acceder ás bases completas do concurso.

BASES

Actuacións contra a violencia de xénero

     O pasado luns 26 de novembro, co fin de conmemorar o Día Internacional Contra a Violencia de Xénero, tivo lugar no noso centro un acto no que participaron alumnos e alumnas de 3º e 4º ESO e parte do profesorado e persoal non docente. A actividade consistiu na posta en escena de varias performances, cancións, pequenas pezas teatrais, unha homenaxe ás vítimas recentes e a distribución de chapas coa imaxe de mulleres que ao longo da historia loitaron contra a violencia de xénero.

Actividades 25 de novembro

 

Xuntanza de reporteiros e fotógrafos

Magosto

     As castañas, a ra, os zancos, a chave, a corda, o aro, as carreiras de sacos, o xogo das cadeiras, o da botella... foron os protagonistas do magosto celebrado na tarde do pasado luns no noso centro.
     Algúns descubriron habilidades ocultas relacionadas coa puntería ou o equilibrio e outros puxéronse as botas enfouzando con tizóns a quenes pillaron por banda.

Lecturas de terror

     Os días 2 e 5 de novembro realizáronse, no vestíbulo do centro, unha serie de actividades centradas en diferentes historias de terror, medo e intriga. Os alumnos e alumnas de 4º ESO leron relatos elaborados a partir de historias de medo recompiladas no seu entorno. Por outra banda, proxectáronse uns vídeos de terror, narrados e montados polo alumnado de 3º ESO A nas materias de Lingua e Literatura Castelá e Tecnoloxía.

      Para as lecturas de terror o equipo da biblioteca ambientou o espazo, no que tamén se expuxo unha selección de libros e películas relacionados co tema.

     

     Aquí tedes un pequeno vídeo con fragmentos das lecturas realizadas.

SAMAÍN 2018

Voluntariado da Biblioteca

   

     Velaquí tedes o equipazo de voluntarios e voluntarias que colaborarán este curso na nosa biblioteca: Pedro, Dani, Sara, Paula, Noa, Laura, Anxo, Andrés, Antía e Jennifer. A vindeira semana teremos os carnés e comenzaremos as prácticas de xestión, ademais dos preparativos da celebración do Samaín.

Doazóns de libros para a Biblioteca

     Esta semana, ademais das novidades mercadas pola Biblioteca, temos novos títulos nos nosos fondos grazas ás doazóns de dous membros da Comunidade Educativa do IES Illa de Ons: Iván Novas (presidente da ANPA do centro) e Lourdes Garrido (profesora de Lingua e Literatura Castelá).

Moitas grazas pola vosa xenerosidade.

Doazón de libros de Iván Novas

Doazón de libros de Lourdes Garrido

Maleta viaxeira de BANDA DESEÑADA

     A ASESORÍA DE BIBLIOTECAS ESCOLARES puxo a disposición dos centros unhas maletas viaxeiras co fin de achegar materiais que sirvan para reforzar e apoiar as iniciativas de formación no ámbito do fomento da lectura.

     O noso centro solicitou para o mes de outubro a MALETA DE BANDA DESEÑADA, que conta cunha selección de cómic e novela gráfica, para coñecer autores e títulos de banda deseñada que están a ser referencia entre os lectores do xénero.

     A maleta viaxará pola aulas dos distintos grupos, que disporán dela durante a hora de ler no calendario establecido.

Esta selección de libros completará a dotación da biblioteca de aula que foi actualizada durante a semana pasada.

OBRADOIRO DE ARTE

     O pasado sábado tivo lugar en Bueu o Concurso Internacional de Debuxo "Nenos polos Dereitos Humanos", impulsado polo artista Cristóbal Gabarrón, para conmemorar o 70 aniversario da Declaración Universal dos Dereitos Humanos.

    A actividade desenvolveuse durante a mañá a carón do Estaleiro do Purro e contou coa colaboración da Asociación de Veciños da Banda do Río, artistas e estudantes de Belas Artes. Uns douscentos rapaces e rapazas participaron nesta iniciativa, entre eles alumnado do noso centro, que traballaron a idea previamente na materia de Educación Plástica e consultaron bibliografía na Biblioteca para coñecer máis a fondo persoeiros que durante a historia loitaron polos dereitos humanos.

Deixámosvos cun vídeo resumo desta xornada.