Foto biblioteca

Foto biblioteca

21/12/20

Premio pola Educación en Valores

Un ano máis o alumnado do IES Illa de Ons recibe un dos Premios Provinciais á Xuventude da Deputación de Pontevedra na categoría de Educación en Valores. Nesta ocasión foron os alumnos e alumnas de 4º ESO do curso 2019/2020, coordinados por Diana (profesora de Xeografía e Historia) e Kike (profesor de Tecnoloxía e TIC), os que co Proxecto Podcast. Unha historia digna de contar, acadaron un merecidísimo recoñecemento polas estupendas recreacións históricas elaboradas durante o pasado confinamento.


Recomendámosvos estas amenas leccións de historia que verdadeiramente son dignas de escoitar. Podedes acceder ao Programa na plataforma de Ivoox onde están todos os podcast publicados. Tamén a Asociación Socio-pedagóxica Galega publicou recentemente unha selección deles:


A Guerra das Galaxias, unha película de Ronald Reagan de Antía Novas Arribas

En plena Guerra Fría, o mundo estaba atemorizado ante unha posible guerra nuclear entre EUA e a URSS. Ronald Reagan, presidente dos EUA, ten a solución á ameaza soviética, pero a idea non vai ser sinxela de levar a cabo.

 

Diario dunha guerra de Sara Soliño Iglesias

O señor Zuo cóntanos, desde a súa percepción e vivencias, a época da Revolución Comunista China, tamén chamada Revolución de Mao Zedong.

 

Mal inherente ou indiferenza de Paula Fernández Cruz

Unha reporteira de orixe xudía acode ao xuízo do ano. Un dos maiores asasinos nazis do século XX ten que pagar polos seus actos. Tras presenciar na súa propia pel os terribles actos levados a cabo na Segunda Guerra Mundial e ver en persoa a un dos principais causantes de tanto sufrimento lévase unha inquedante sorpresa


Berlín 1961: Sentimentos separados de Marta Veleda Pérez

Marta, unha xornalista do Washington Times terase que enfrontar durante a época da Guerra Fría a noticias tan duras como a crise dos mísiles ou os sentimentos que provoca o muro de Berlín.

Entrega de premios e IV Certame de Fotografía "Obxectivo Bueu"

     Hoxe tivo lugar na biblioteca do centro a entrega dunha serie de premios que quedaran pendentes do curso pasado por mor da pandemia. Como en xuño non se puido desenvolver o curso de fotografía que nos últimos anos estaban a recibir os participantes no Certame de Fotografía "Obxectivo Bueu", a coordinadora da biblioteca, en representación da propia biblioteca e da ANPA, entregou ao alumnado un agasaio: un trípode de pequeno formato para móbiles.

    Ademais, presentouse o Certame de Fotografía deste curso académico, que nesta ocasión centra a súa temática no coidado aos maiores. O alumnado do IES Illa de Ons interesado en participar neste certame poderá entregar seis fotografías antes do 30 de xaneiro do 2021 no enderezo de correo electrónico indicado nas bases que presentamos a continuación. 




11/12/20

Lecturas e música recomendadas

   A Coordinadora de Equipos de Dinamización Lingüística do Morrazo elaborou as seguintes guías de lectura e música en galego, recomendadas para agasaiar nestas vacacións. A vindeira semana recibiremos os trípticos impresos de secundaria para distribuír entre o noso alumnado. 


04/12/20

Agasaio de BE

     Hoxe chegounos de Bibliotecas Escolares unha caixa cunhas fermosas libretas e marcadores de páxinas que iremos agasaiando ás voluntarias da biblioteca e aos nosos usuarios e usuarias.  O deseño é de Bea Lema, a ilustradora dos carteis para as bibliotecas escolares de Galicia deste curso que, co lema elixido, XEOGRAFÍAS LECTORAS NA BIBLIOTECA ESCOLARofrece unha imaxe evocadora deses mundos imaxinarios que a lectura pode axudar a visitar e construír.


     Moitísimas grazas por este agasaio!

30/11/20

Novidades na bilbioteca

 Boas a todos e todas!

     Estes dous últimos meses a biblioteca ampliou os seus fondos con moitas novidades en material de ficción e información, tanto en galego como en castelán, e especialmente en materia de igualdade e inclusión. Achégate ao noso espazo e solicita á responsable todo aquilo que sexa do teu interese. 

     Velaquí unha mostra dalgúns exemplares de recente adquisición.



27/11/20

Obradoiro de escritura expresiva

    Os días 24 e 26 de novembro tivemos a oportunidade de gozar cun obradoiro de escritura expresiva impartido por Marisé Barreiro nos grupos de 3º e 4º de ESO. 
 

    A finalidade da actividade era saber que a escritura ten outras aplicacións distintas á puramente académica e pode empregarse como medio de comunicación con nós mesmos, para coñecernos mellor.  Durante o obradoiro puidemos practicar unha escritura máis íntima, mergullándonos cara o noso interior...
 
    Aí van algúns poemas colectivos que saíron nos distintos grupos:
 

3º ESO A

O meu avó tiña 16 anos e a miña avoa 13
libre como dí a palabra
soidade
os abandonan
constancia
diversión
esforzo
necesidade
traballou no mar
hai moitas
agardando a chegada.
 

3º ESO B

Os sentimentos son unha tormenta
E eu son o paracaídas
A miña familia é unha cascada
E eu son o lirio que nada á súa beira
Se a vida é o mar , eu eu nado nel
A miña tristeza e un río
Polo que eu navego ata chegar ao final
El fútbol es mi vida
Os meus pais son coma os castiñeiros
Clásico:
As árbores están cheas de montes.
 

4º ESO A

A min gústame durmir
Cando oio a alguén dicir iso, derrúmbome
Sen buscar nada máis
Cando xa era noite
É case a metade da súa vida
Ignorancia e sufrimento
Somos bastantes
Miña nai
 

4º ESO B

Se había caído por las escaleras
si se quiere se puede
todo o mundo ten erros
policía
mar
distancia
monte
tan hermoso

24/11/20

Actividades 25 N

    O equipo do proxecto IGUÁLA-T, do que esta biblioteca forma parte, leva planificando desde o comezo de curso actividades que favorezan boas prácticas no campo da igualdade e a prevención da violencia de xénero.

    Para conmemorar o Día Internacional da Non Violencia Contra as Mulleres, decidimos seleccionar dous libros de poemas sobre os que traballar: Amor se escribe sin sangre I e II e Sulagar o soño, este último da nosa compañeira Montse Villar. Algunhas autoras dos poemas colaboraron co noso centro elaborando vídeos recitándoos e están sendo proxectados e comentados cada día durante a "hora de ler" en todos os niveis educativos. Por outra banda, a semana pasada gravamos un vídeo no propio centro baseado no poema Ensináronme, de Montse Villar, que será proxectado mañá.


     Ademais, traballarase nas titorías o tema das relacións tóxicas na adolescencia, analizando distintas condutas de rapaces e rapazas ante situacións que, por desgraza, están a ser bastante habituais.

08/11/20

Obradoiro de poesía con Raúl Vacas

       O pasado luns visitou o noso centro Raúl Vacas, poeta e escritor salmantino, autor do libro Niños raros que este trimestre está a ler o alumnado de 1º ESO. Raúl chegou cunha peculiar maleta da que saíron obxectos sorprendentes, creadores de poesía e xeradores de felicidade para quenes escoitabamos a este mago das palabras.

NIÑOS RAROS | RAUL VACAS POLO | Comprar libro 9788467586176

    Niña de espuma, Niño frío, Niña de humo ou Niño koala, son algúns exemplos dos cativos que o autor presenta neste libro con todas as súas peculiaridades e dunha maneira moi poética, xogando coas palabras, rimando con números e despregando unha serie de recursos nos versos que, coas ilustracións que os acompañan, recrean un marabilloso mundo máxico e extravagante. 

    O seguinte vídeo recolle imaxes dos obradoiros impartidos no noso centro por Raúl Vacas nos grupos de 1º e 2º ESO. A canción Niña búho é da artista Chloé Bird, que puxo música aos poemas deste libro no disco Un mundo de niños raros.


    Moitísimas grazas por esta experiencia!

23/10/20

Hora de ler

    Despois destas primeiras semanas de aterrizaxe no novo curso e feitas as avaliacións iniciais, por fin podemos poñer en marcha a "Hora de ler", un tempo dedicado diariamente á lectura (os primeiros 20 minutos da sesión de clase que corresponda). Xeralmente adoitamos animar ao alumnado a que traian o libro que lles apeteza para facer unha lectura libre, pero o profesorado tamén pode facer lecturas guiadas por materias ou lecturas compartidas. Todos os anos establecemos un calendario semanal cos 20 minutos de lectura diaria que van rotando de sesión: a primeira semana faise na primeira sesión de clase, a segunda semana na segunda sesión e así sucesivamente. Nos cortizos das aulas xa temos colocado este calendario para non despistarnos.



09/10/20

Biblioteca virtual

    Ademais das actividades de xestión propias de todo comezo de curso, o equipo da biblioteca está a traballar na planificación dun protocolo ante a posibilidade de que se produzan situacións de actividade non presencial, parcial ou total. Entre outras actuacións cómpre destacar a promoción do uso de ferramentas virtuais de videoconferencia que permitan a apertura da BE en horarios determinados, con profesorado de garda, con posibilidade de reunirse e favorecer encontros entre o alumnado de distintos cursos....

    Tamén estamos a deseñar un espazo virtual para poñer a disposición da comunidade educativa distintos recursos en liña: ligazóns de interese, materiais dixitalizados, títulos para libros electrónicos, material en liña: libros, prensa, audiolibros, xogos... 

    Presentámosvos os borradores dalgunhas das páxinas da nosa biblioteca virtual.






21/09/20

Biblioteca segura

    Pois xa temos a biblioteca preparada para comezar este novo curso dun xeito seguro. Nos seguintes carteis, que atoparedes no cortizo da entrada e en distintos puntos da biblioteca, tedes toda a información necesaria para coñecer o protocolo que seguiremos en canto ao uso deste espazo.



16/09/20

Protocolo COVID 19

                Neste novo curso que comeza, a biblioteca continuará a ser o lugar de referencia para a lectura, a información e as diferentes aprendizaxes. Para facer un uso seguro deste espazo común, o equipo da biblioteca está a ultimar un protocolo cunha serie de normas que a comunidade educativa debe cumprir para que todo funcione correctamente. Mentres  deseñamos os carteis infográficos que ilustrarán estas normas, podedes ir vendo nesta presentación unha idea das medidas que imos tomar.

Agardámosvos na biblio!

29/06/20

Subscrición á revista "O Papagaio"


    Esta mesma semana o equipo da biblioteca pensou que sería boa idea ofrecer ao alumnado un xornal entretido e interesante para o vindeiro curso, tanto se retomamos as clases presenciais coma se repetimos a situación de confinamento. Por este motivo decidimos subscribirnos á publicación O PAPAGAIO, un xornal para a xente miúda, impreso en papel reciclado e a cor, con periodicidade mensual e que trata temas de ciencia, ecoloxía, arquitectura, banda deseñada, literatura...

    O mellor de todo, que temos acceso á versión impresa e á dixital! Hoxe mesmo, desde o correo da biblioteca, o alumnado recibirá os tres últimos números editados para comezar as vacacións de luxo...

    Velaí un par de páxinas desta publicación:




19/06/20

Reserva de lecturas para o verán


Ilustración de Andrea López Álvarez

    Interesaríache levar libros da túa biblioteca para gozar da lectura este verán? Consulta o noso CATÁLOGO para comprobar que temos os libros que queres e segue estas instrucións para poder reservalos:
  1. Recorda que para facer unha procura no catálogo por título non debes incluír o artigo inicial, se é que o ten. Para facer a procura polo autor ou autora escribiremos o seu primeiro apelido. Por exemplo, se queremos o libro A balada dos unicornios de Ledicia Costas, procurarémolo polo título escribindo "balada dos unicornios" ou pola autora "Costas".
  2. Unha vez comprobes que a biblioteca conta co libro que ti queres, debes escribir un correo electrónico a biblioteca@iesillaons.com e solicitalo.
  3. O luns 22 de xuño pola mañá verificaremos que está dispoñible para emprestar. Recibirás un correo confirmando que podes recollelo na secretaría do centro cando te achegues o día 23 de xuño a recibir as notas.
  4. Lembra que antes de recoller o exemplar ou exemplares reservados, debes facer a devolución dos libros da biblioteca que levaches para a casa durante a corentena.
    Animádevos a gozar do pracer da lectura no verán!

11/06/20

Premios Provinciais á Xuventude

     A Deputación de Pontevedra, a través do Servizo de Cohesión Social e Xuventude, pon en marcha a cuarta edición dos Premios Provinciais á Xuventude, coa finalidade de promover o talento e o potencial da mocidade da nosa provincia.


    Queremos animar aos membros da nosa comunidade educativa a participar nesta convocatoria. Recordade que o noso centro recibiu, este mesmo curso, o Premio Educación en Valores polo proxecto interdisciplinar Miserábeis. O Musical.
  

    

      O xurado destacou "a nosa aposta por un proxecto de teatro musical como procedemento para educar en igualdade e nas competencias clave de carácter intelectual e socio-emocional".

    A convocatoria está dirixida a mozas e mozos de idades comprendidas entre os 16 e os 35 anos, nas modalidades de iniciativa social, iniciativa empresarial, contido dixital, traballo musical, traballo literario breve, fotografía orixinal, e deseño e moda.

    O prazo de inscrición será de tres meses e comezará, tras o levantamento do estado de alarma, a partir do día seguinte ao da publicación deste no BOPPO e na páxina www.depo.gal.


    Consulta as Bases completas

05/06/20

Doazón de libros

    Este curso a biblioteca ampliou considerablemente os seus fondos bibliográficos grazas á asignación do propio centro, á dotación económica de Plambe e outras destinadas ás seccións de Coeducación, STEAM, Biblioteca Inclusiva e Club de Lectura. Pero ademais recibimos unha importante doazón de libros de literatura para distintas idades por parte da profesora de Lingua e Literatura Castelá Lourdes Garrido, que foron catalogados durante esta corentena. Moitísimas grazas, Lourdes, pola túa xenerosidade!

Ilustración de Karina Cocq

    Algúns destes libros son de literatura infantil e xuvenil, pero tamén hai exemplares de narrativa, poesía e teatro que poden interesar aos adultos da nosa comunidade educativa. Consultade o noso CATÁLOGO.

01/06/20

Cuarto posto na Olimpíada Galega de Historia

    Co lema a pandemia non nos para, 12 equipos, formados por 48 estudantes de Educación Secundaria Obrigatoria de Galicia e 12 titores e titoras, competiron este venres na III Olimpíada Galega de Historia, organizada pola Facultade de Historia do campus de Ourense.
    A través da plataforma Kahoot, as e os estudantes competiron durante tres horas en diferentes roldas de pregunta-resposta sobre os contidos do currículo da materia de Xeografía e Historia de 4º curso de ESO. Á final chegaron os equipos Santa Irene de Vigo e Calasanz Padres Escolapios da Coruña, impoñéndose na final Calasanz Padres Escolapios da Coruña. En terceiro lugar quedou o centro Ramón Otero Pedrayo de Ourense e en cuarto posto o Illa de Ons de Bueu.


    Velaquí unha imaxe da competición, coa profesora de Historia do noso centro Diana Vilas (terceira pola dereita), titora do equipo das Wall-Stone-Craft, formado polas alumnas Antía Novas, Paula Fernández, Sara Soliño e Carla Moital.
    Noraboa a todas!

27/05/20

O Illa de Ons na III Olimpíada de Historia


    A Facultade de Historia do campus de Ourense celebra a III Olimpíada Galega de Historia co obxectivo de fomentar a paixón polo coñecemento do pasado entre os máis novos e novas. Nela competirán nun concurso de pregunta-resposta 12 equipos formados por estudantes de Educación Secundaria Obrigatoria ou Educación Secundaria de Adultos dos centros de Ensino Secundario de Galicia.
    O noso centro participará co equipo das Wall-Stone-Craft, formado polas alumnas Antía Novas, Paula Fernández, Sara Soliño e Carla Moital.
    Debido á pandemia a cita terá lugar de xeito virtual, podendo seguirse por streaming no enlace https://tv.uvigo.es/live/5b60870c8f4208dd20625884 o vindeiro venres 29 de maio desde as 10:00h.

    Moita sorte, rapazas!!!

23/05/20

Proxecto Podcast: unha historia digna de contar

     Durante este trimestre o noso centro está a realizar distintas actividades colaborativas cos diferentes grupos de alumnos e alumnas. Unha delas é o Proxecto Podcast. Unha historia digna de contar, desenvolvido polo alumnado de 4º ESO a través das materias de Historia e TIC, para o que guionizaron, gravaron e editaron recreacións históricas de feitos acontecidos ao longo do século XX.
     Diana (profesora de Historia) e Kike (profesor de TIC) foron os organizadores desta extraordinaria actividade que contou como colofón cunha sorprendente gala de entrega de premios aos mellores Podcast. Non te perdas as mensaxes dalgúns convidados...

22/05/20

Rosalía e Pido talvez

     Rematamos a publicación de caligramas dedicados a Calero cos poemas E agora som um velho patrom, Rosalía e Pido talvez, que serviron de inspiración para as poesías visuais do alumnado do IES Illa de Ons.

E agora som um velho patrom

E agora som um velho patrom que
se senta ao sol no banco de um passeio.
A minha vida fica atrás. Foi minha?
Quem fum outrora?

Fum eu -este que agora som- aquele
que estes mesmos carreiros transitava
um tempo perseguindo a borboleta
ilusória do amor, e neste mesmo
banco torrava o coraçom, ao sol
do rosto de umha forma feminina,
já nom sei qual, ao meu carom sentada?

A minha boca que articula agora
um monológico silêncio, é
aquela que sabia dialogar
consoante a gramática perdida?

Nem apego me fica ao que onte fum,
nem ao que onte regia o meu falar
e o concertava com o falar seu.

Nacim já velho neste banco ao sol,
e aquel que outrora fum morreu em mim,
e sinto-o como um outro
que nom herdei, pois nada tenho del.

Mocidade nom tivem; som um velho
de poucos anos, que nacim assi.
Apócrifa é a história
com que alguns me encadeiam
às alegres tristezas de um passado
de harmonioso furor primaveral.

Sentado neste banco, tam só espero
que de mim mesmo brote o sono. Aquela
moça que se detém perante mim
—talvez onte ao meu lado se sentava—,
estorva-me hoje, e a seguir convido-a
a sua via, pois furta-me o sol.

Breixo Parada - 3º ESO A

Rosalía

Foches unha mociña, viva chama,
que se queimóu no lume decotío.
Como a Brunilda, arrodeóute un valo
de herdados fogos, língoas de outro esprito.
Ningún Sigfrido liberóute. Virxe,
a ti mesma aluméacheste Sigfrido.
E saíches da Islandia do teu sono,
pra unha Worms sen coroa e sen marido.
Pura, no teu castelo solitario
ollache o ceo, enxergache o abismo,
veados os retratos familiares,
as cartas sen abrir, pechos os libros.
Como unha nube, pois, como unha brétema,
como un arcanxo ou como un asubío,
chegóu a ti o Segredo, unha aza branca
e outra moura. Dixécheslle: «Benvido».
Ninguén cho presentóu. Ti o percuraches.
O que dos outros tiñas deprendido,
esquecido ficóu. SÓ xa o diálogo
co enigmático Hóspede sostido 13.

  
Enara Ferradás - 1º ESO B

 

Pido talvez

Pido talvez o que nom podes dar-me.
O que talvez ninguém
pode dar-me. Isso pido.
Mas se tenho necessidade
desse alimento, pouco consolo é
para a minha fame que tal grao
nom se dê nas estepas desta terra.
Pede-lhe a quem me pujo neste mundo
o pam que deveu pôr-me baixo o braço
cando nacim.
Umha liçom de geografia económica
nom é farinha para o coraçom.
 
Hugo Dopazo - 1º ESO B

 
Leire Otero - 1º ESO A