Foto biblioteca

Foto biblioteca

19/06/24

Contigo

      O pasado xoves día 13 visitamos, co alumnado de 1º B, o centro de día Contigo en Bueu. Alí fomos recibidas con moito cariño polas persoas maiores e o persoal de traballo, que nos abriron as súas portas e os seus corazóns. Despois de falar con cada persoa do centro, encheron o ambiente coa súa sabedoría e historias de vida, e nós, a cambio, recitamos diversos poemas en tons alegres. Rematamos cun poema en contra da guerra e unha pequena representación acompañada de música levando a nosa mensaxe de paz e solidariedade.


     Para rematar esta xornada tan especial, obsequiamos ás persoas que alí estaban cun chaveiro elaborado no instituto coa cortadora láser de Polos Creativos, que inclúe o verso “Digo basta!" de Celso Emilio Ferreiro, unha maneira simbólica de transmitir o noso desexo de poñer fin ás inxustizas e aos conflitos.

16/06/24

Chegou o día de Miserábeis

     Hoxe é unha data moi especial. Alumnado, profesorado, persoal non docente, exalumnos, exalumnas e familias do IES Illa de Ons, levamos meses traballando con dedicación, esforzo e paixón neste proxecto pedagóxico. Cada ensaio foi unha peza fundamental para chegar ata aquí e sabemos que non foi doado, pero hoxe seguro que todo ese traballo vai dar os seus froitos.

     Ao subir ao escenario lembrade que o talento e a entrega que demostrastes durante todo este tempo vai facer desta función algo inesquecible e agora toca gozar e emocionarse cos vosos compañeiros e compañeiras e co público.

    Grazas por contribuír non só á arte e á cultura, senón tamén á nosa identidade e á nosa lingua. Moita sorte e a por todas!



Reportaxes de Miserábeis emitidos en televisión:

(Inicio no minuto 43)

(Inicio no minuto 16:30)

31/05/24

Musical Miserábeis


     Alumnado, profesorado, persoal non docente e familias do IES Illa de Ons, estamos a realizar os últimos ensaios para a posta en escena de Miserábeis. O Musical, un proxecto de carácter interdisciplinario baseado na obra de Víctor Hugo, no que a nosa Comunidade Educativa traballou durante os cursos 18/19 e 19/20 e que foi interrompido pola pandemia. Este ano decidimos poñelo novamente en marcha, trasladando a historia orixinal a unha contorna máis galega de finais do século XIX.


     Durante un acto celebrado esta mañá no concello de Pontevedra, as profesoras Diana Vilas e Teté García, directoras do proxecto, presentaron o musical acompañadas polo edil de Cultura Demetrio Gómez.

Imaxes dos ensaios
     As entradas, con carácter de donativo para sufragar os gastos da posta en escena, están á venda desde o próximo luns día 3 de xuño no IES Illa de Ons de Bueu e no despacho de entradas do auditorio do Pazo da Cultura de Pontevedra.
     
     Non faltedes!


30/05/24

Club de lectura MANGA

 O club de lectura MANGA, formado por alumnado dos diferentes niveis educativos, reuniuse en varias ocasións durante este trimestre para ler e comentar distintos aspectos de Neon Genesis Evangelion. Vol 1, unha adaptación ao manga do anime homónimo creado por Yoshiyuki Sadamoto. 


     Esta semana a biblioteca adquiriu unha serie de títulos para que o alumnado deste club poida elixir lecturas para o vindeiro curso e vaia ideando actividades vinculadas a cada unha delas.


13/05/24

Luísa Villalta

 Un ano máis celebramos o Día das Letras Galegas, nesta ocasión homenaxeando a figura de Luísa Villalta, autora nada na Coruña o 15 de xullo de 1957. 
Recomendamos ler o artigo biográfico Luísa Villalta. "E formo parte", de Ana Romaní, publicado na páxina da Real Academia Galega, así como as distintas biografías publicadas sobre a figura da autora, entre elas a guía escrita por Anxo Rajó Pazó, da editorial Ir Indo.


     No noso centro montamos a exposición cos carteis gañadores do Concurso-Exposición Letras Galegas 2024: Viaxe polo metaverso con Luísa Villalta, do CIFP A Carballeira - Marcos Valcárcel de Ourense,  nos que se amosa a autora como un avatar que nos convida a percorrer a súa traxectoria persoal e profesional a través do metaverso, unha realidade virtual na que podemos descubrir imaxes, recursos e actividades interactivas. Esta exposición vén acompañada dunha guía didáctica, que nos permite realizar un percorrido polos momentos máis significativos da biografía e pola obra e a época da autora.


    Ademais, na materia de Lingua Galega e Literatura, o profesorado dos distintos niveis está a realizar varias actividades arredor da autora homenaxeada.

29/04/24

Carlos Labraña no IES Illa de Ons

     A biblioteca do centro acolleu hoxe unha actividade teatral arredor da obra O valo, na que tivemos a sorte de contar co autor da mesma, Carlos Labraña. Esta obra dramática, proposta como lectura do club para 1º ESO polo “Día da Paz”, fixo reflexionar ao alumnado sobre a igualdade entre as persoas, os límites irracionais establecidos polo poder e a necesidade urxente de acabar coas inxustizas no mundo. O alumnado caracterizouse e dramatizou, poñéndose na pel dos distintos personaxes da historia, demostrando que o IES Illa de Ons segue a ter unha canteira de artistas!

Encontro con Montse Villar

 O alumnado de 1º ESO tivo unha visita moi especial o pasado venres, a de Montse Villar, poeta e antiga profesora do noso centro. Durante este encontro coñecimos unha parte moi importante da súa obra, solidaria cos máis desfavorecidos e crítica coas desigualdades sociais, falounos de varios dos seus libros nos que trata diferentes inxustizas e aprendimos que os poemas poden ter dúas lecturas, como en Ubuntu, horizontal e vertical, e que incluso se poden bailar.

     O alumnado tamén traballou en grupos deseñando o seu propio libro, ao que irán engadindo distintas creacións literarias elaboradas por eles mesmos durante o que resta de curso.

    Moitas grazas, Montse!

25/04/24

Obradoiro de papiroflexia

    A vindeira semana dará comezo na biblioteca un obradoiro de papiroflexia, dirixido tanto a alumnado como a profesorado do centro, impartido por varios alumnos e alumnas de 1º ESO. Cada martes e xoves do mes de maio, de 11:30 a 11:50, aprenderemos a crear diferentes figuras de papel. 


24/04/24

Día do Libro

     Para conmemorar o “Día do Libro” organizouse, na entrada do noso centro, unha exposición con materiais elaborados polo alumnado de 4º ESO nas materias de Lingua e Literatura Castelá e Tecnoloxía.

   Por un lado, nas  clases de Lingua e Literatura Castelá, o alumnado deseñou libros despregables de distintos títulos lidos durante o pasado trimestre. En Tecnoloxía, tras practicar programación na plataforma COSPACES na 2ª avaliación, o alumnado traballou a realidade aumentada con Merge Cube seguindo a plantilla “Book report”; introduciron información nos cadros de texto, personalizaron a apariencia do cubo e engadiron unha escena do libro elixido. Xa na terceira avaliación crearon carteis en Canva coa portada do libro e o QR para visualizar os traballos en realidade aumentada.



     Por outra banda, alumnado e profesorado do centro colaboraron nunha proposta que consistiu na doazón de libros para compartir coa comunidade educativa e tamén coa xente de Bueu. Alumnos e alumnas de 1º e 4º ESO saíron ás rúas para depositar, en distintas localizacións, unha parte dos libros recollidos e así facer a todo o mundo partícipe deste día tan especial.

23/03/24

Digo Viet Nam e basta

     O pasado xoves, 21 de marzo, celebramos o Día da Poesía cunha nova visita da poeta Míriam Ferradáns. A autora falou co noso alumnado da linguaxe e dos sentimentos, das palabras que transmiten emocións, de simbolismo, de rimas, de identidade e do poder evocador dalgúns poemas, como “Digo Viet Nam e basta", escrito por Celso Emilio Ferreiro e dedicado ao pobo palestino. Porque onte ademais de falar de poesía tamén quixemos falar de paz e, como di Míriam, para iso é inevitable falar de guerra. 

Digo Viet Nam e basta

Digo bomba de fósforo.
Apenas digo nada.

Digo lombriga e larva
de carne podrecida.

Digo nenos de napalm,
terror de noite e selva,
fedor de cidade e cloaca.

Fame, suor, aldraxe,
pugas de aceiro, antropofaxia.

Digo guerra bestial,
tremor de terra, crime, lume, lava,
estoupido, verdugo
e mortandade en masa.
Digo gas abafante.

Apenas digo nada.
Digo yanqui invasor,
depredador de patrias.

Digo plutonio, pentágono,
esterco bursátil, palanca,
Presidente, gadoupa,
chuvia, amargura, baba.

Digo petróleo, ferro,
mineral, trampa,
lobo, caimán, polaris, cóbrega,
miseria, diplomacia.
Digo devastación que USA, usa.

Apenas digo nada.
Digo Viet Nam i está xa dito todo
cunha soia palabra.

Para abranguer a vergonza do mundo,
digo Viet Nam e basta.

Viaxe ao país dos ananos 1968

     Este poema fai que abramos os ollos ante a realidade, os seus versos transmiten a traxedia e a crueldade dos conflitos armados, ademais dunha mensaxe de loita e de repulsión ante as inxustizas e o abuso de poder.

   Moitas grazas, Míriam, por achegarnos un pouco máis á arte da lingua.

17/03/24

"A lebre mecánica" e "Que me pare o corazón se te esquezo"

    O club de lectura de 3º ESO xuntouse esta semana para falar de dous libros que tratan problemas que afectan na actualidade a moitos mozos e mozas, por un lado a ludopatía e as apostas en xogos ou competicións e por outro determinadas condutas perigosas nas redes sociais. "A lebre mecánica" de Ledicia Costas e "Que me pare o corazón se te esquezo" de Andrea Maceiras, permitiron adentrarnos en mundos moi perigosos e de fácil accesibibilade para a xuventude.    

As cousas entre Nana e Corvo ultimamente non van nada ben. Conseguiran construír un mundo onde compartían todo: películas, música, manga, videoxogos... Non querían separarse nunca. Mais iso era antes. Agora Corvo desaparece durante horas e non conta onde vai. Cando Nana lle pregunta que lle pasa, enfádase. No seu grupo de amigos ninguén comprende que lle sucede. Desde que empezou a ir en serio coas apostas semella outro. O que antes era pura diversión converteuse nun pesadelo. Case sen decatarse, Corvo acaba metido nunha rede de problemas da que semella imposible saír. 
Sinopse publicada pola Editorial Xerais  

  

    Blue Shiva é a deusa das redes sociais. Na súa popular canle aparecen os retos virais máis arriscados. Pero tamén é unha deusa fráxil. A noite en que decide camiñar polo bordo dun edificio de dez andares, só desexa que a chuvia deteña a súa ousadía. Porén, Nordestal é unha cidade ventosa, e Blue Shiva precipítase ao seu propio abismo. Axiña as redes sociais difunden a nova da súa morte. Do outro lado da pantalla, Ada, que non pode crer que Blue Shiva xa non exista, pídelle axuda á súa irmá xemelga, Lúa, e convértea en cómplice involuntaria. Pola súa banda, Gabriel regresa a Nordestal guiado polos latexos do seu corazón. Narrada a dúas voces, Que me pare o corazón se te esquezo é unha historia sobre ese mar que nos axita por dentro e sobre aquel que se abre alén das nosas pantallas, tinguido pola peor sombra e, ao tempo, capaz da maior luz. 

Sinopse publicada pola Editorial Xerais 

15/03/24

Cabezudas polo clima

     Este curso o IES Illa de Ons está a participar en TransformARTE 2.0: Arte en acción, un proxecto que combina arte e concienciación ambiental, co obxectivo de crear unha campaña visual para tomar conciencia sobre a situación do planeta ante os efectos do cambio climático.

    En 1ºESO colaboramos coa actividade “Cabezudas polo clima”, na que o alumnado investigou sobre distintas activistas ambientais que loitan, desde distintos lugares do mundo, contra o cambio climático. A pasada semana organizamos no centro unha exposición con carteis que recollen os resultados deste traballo de investigación, acompañados pola imaxes elaboradas en volume das cabezas das doce activistas.













13/03/24

Homenaxe ás avoas no 8M

    O venres pasado tivemos na biblioteca unha visita moi especial e das que máis ilusión fixo ao noso alumnado. Algunhas das avoas das rapazas e rapaces de 1º ESO achegáronse ao centro para compartir con nós unha data tan importante coma o 8 de marzo. O alumnado preparou, na materia de Lingua e Literatura Castelá, unha entrevista cunha serie de cuestións para coñecer un pouco máis as vivenzas destas mulleres desde a súa infancia. Ao finalizar, os netos e netas de cada unha delas entregáronlles unhas cartas redactadas con moito agarimo e agasalláronas cuns broches de flores de origami elaborados polo alumnado colaborador da biblioteca.

     Ademais, aproveitamos a súa visita para realizar con elas unha práctica de retrato fotográfico como parte do proxecto "Fotografía en curso", que estamos a desenvolver este ano no noso centro dentro do Plan Proxecta.

   Moitas grazas a todas! 

12/03/24

"A foto fala” e "Tes un minuto?"

      Lembramos á comunidade educativa do IES Illa de Ons que o Equipo de Dinamización da Lingua convocou para o presente curso dous certames audiovisuais: “A foto fala” e “Tes un minuto?”.

     O prazo para presentar os documentos do certame "A foto fala" amplíase ao 15 de abril e os vídeos de "Tes un minuto?" poderán entregarse ata o 26 de abril.



07/03/24

Delmira Agustini. A estraña dor dun pensamento.

    Esta semana tivemos a sorte de contar coa presenza da poeta Míriam Ferradáns na biblioteca. "¿No habéis sentido nunca el extraño dolor de un pensamiento? Delmira Agustini, la intrusa del Modernismo" é o título deste encontro literario co alumnado de 4ºESO, proposto desde a materia de Lingua e Literatura Castelá.

     Durante a súa exposición, Míriam falou das características fundamentais do Modernismo para entender a importancia da figura de Delmira, que foi capaz de ser quen quixo ser a pesar da súa procedencia e das circunstancias do seu país e que tratou o tema do desexo feminino, prohibido neses tempos para as mulleres.


“No me mata la muerte”. Curtametraxe realizado con intelixencia artificial sobre Delmira Agustini que foi proxectado durante a actividade.

02/03/24

Míriam Ferradáns e Delmira Agustini

     Esta semana, a escritora Míriam Ferradáns visitará o noso centro para realizar unha actividade co alumnado de 4º ESO, enmarcada no programa “Por qué leer a los clásicos”, promovido pola Dirección Xeral do Libro, do Cómic e da Lectura (Ministerio de Cultura e Deporte). Neste encontro literario, a autora achegará ao alumnado á figura de Delmira Agustini, unha das poetas máis representativas da poesía hispanoamericana do século XX.

29/02/24

25 anos do Salón do Libro

O vindeiro día 1 de marzo dará comezo o XXV Salón do Libro Infantil e Xuvenil de Pontevedra, que terá lugar no Pazo da Cultura de Pontevedra ata o día 17 de marzo.

     Baixo o lema "Maxia", a mostra, que este ano cumpre a súa vixésimo quinta edición, terá como protagonista principal a literatura infantil e xuvenil, mais contará cunha programación dirixida para público de todas as idades con multitude de propostas como actuacións teatrais, sesións de cinema, concertos de música ou charlas-coloquio, entre outras

     O horario do salón será de 17:00 a 20:00 h. de luns a venres e de 11:00 a 14:00 h. e de 16:30 a 20:00 h. os sábados e domingos.

23/02/24

Día de Rosalía

   

     Para conmemorar o 23 de febreiro, Día de Rosalía, propuxemos unha actividade para realizar cos distintos niveis educativos no espazo da biblioteca. Trátase dun xogo no que o alumnado, organizado en pequenos equipos, debía relacionar unha serie de obxectos con fragmentos de poemas de Rosalía.

30/01/24

O valo

     Para conmemorar a data de hoxe, Día da Paz, a coordinadora dos Clubs de Lectura propón para 1º ESO a obra “O valo”, de Carlos Labraña. 

"No medio do deserto, o Soldadiño de Chumbo, un neno soldado, chanta unha bandeira e coloca un valo de arame xusto onde o mapa marca a fronteira. Do outro lado do valo, Sahara, unha rapaza que foxe da guerra, trata de convencelo de que a deixe pasar, xa que está procurando un pozo onde saciar a súa sede. Peza dun único lance para dous personaxes coa guerra de Siria como pano de fondo, “O valo” propón unha emocionante reflexión sobre a igualdade e a paz entre todas as persoas e comunidades."

Sinopse publicada por Editorial Xerais

      Durante as vindeiras xuntanzas do club faremos unha lectura dramatizada, na que o alumnado caracterizarase interpretando os personaxes da obra.

27/01/24

Lecturas de Miserábeis

      Este curso retomamos no centro Miserábeis. O Musical, un proxecto de carácter interdisciplinario baseado na obra de Víctor Hugo, no que a nosa Comunidade Educativa traballou con grande dedicación durante os cursos 18/19 e 19/20. En marzo de 2020 a pandemia impediu a súa continuidade e agora o claustro do centro aprobou poñelo novamente en marcha, facendo partícipe ao alumnado, profesorado, persoal non docente, nais e pais do IES Illa de Ons. 

     Desde a biblioteca seleccionáronse tres adaptacións da obra mestra de Víctor Hugo para a súa lectura nos grupos de 2º ESO, 3º ESO e 4º ESO. Deste xeito facilitarase ao alumnado coñecer mellor a historia de Jean Valjean e dos personaxes das distintas clases sociais que o rodean na Francia do século XIX.

25/01/24

Microrrelatos

 O alumnado de 2º ESO traballou na materia de Lingua Galega o microrrelato. A continuación podedes ver unha selección dos textos acompañados con imaxes.