Encontro literario con Sonia Mirón

    O alumnado de 2º da ESO participou onte nun encontro literario coa escritora Sonia Mirón, autora da novela xuvenil Mi corazón en una caja de zapatos, obra que leron e traballaron na aula durante as últimas semanas. 

    Sonia falou sobre o proceso de creación desta obra e os sentimentos e conflitos que viven os seus personaxes, pero tamén das súas outras novelas e da súa traxectoria como escritora. Destacou que o seu labor como docente inflúe directamente na súa obra, xa que o contacto diario coa mocidade lle permite coñecer de primeira man as preocupacións e situacións que forman parte da súa realidade. Os temas que afectan á adolescencia como a autoestima, as relacións persoais, os conflitos familiares ou o acoso escolar convértense así en fonte de inspiración para crear personaxes e historias coas que os lectores e lectoras poden sentirse identificados.

    O alumnado tivo ocasión de facer preguntas sobre o oficio de escribir, os seus hábitos de lectura ou os seus referentes literarios e a autora respondeu animando aos mozos e mozas a ler, a escribir e a expresar as súas emocións a través das palabras.

Día de Rosalía

      Este ano o Día de Rosalía celebrarémolo participando nun acto organizado no concello de Cangas xunto con outros centros educativos da contorna. Agardámosvos o 23 de febreiro!

Día da Muller e a Nena na Ciencia

    Con motivo do Día Internacional da Muller e a Nena na Ciencia, o alumnado de 1º e 2º da ESO participou nunha actividade artístico-científica na que colaboraron os departamentos de Tecnoloxía, Física e Química, Bioloxía e Xeoloxía e Debuxo. A proposta consistiu na representación de distintas mulleres científicas, ilustrándoas con elementos simbólicos relacionados co seu labor e empregando técnicas e materiais variados. Coas imaxes creadas montouse unha exposición sobre as portas e paredes do corredor das aulas de 1º e 2º ESO. Os nomes identificativos de cada científica foron elaborados en goma EVA coa cortadora láser da aula de Polos Creativos, integrando así tamén o traballo co deseño e a fabricación dixital.

     As mulleres representadas foron: Marie Curie, con distintos elementos propios dun laboratorio; Ángeles Alvariño, representada debaixo do mar rodeada de plancto e elementos mariños; Dorothy Crowfoot Hodgkin, xunto á estrutura molecular da penicilina; Mary Agnes Chase, cun caderno de campo con ilustracións de especies vexetais e referencias ás gramíneas; Ellen Swallow Richards, representada con elementos relacionados coa auga e o medio ambiente e o edificio do Instituto de Tecnoloxía de Massachusetts; Gerty Cori, acompañada do ciclo metabólico que leva o seu nome; Jane Goodall, xunto cun pequeno chimpancé e rodeada de vexetación propia de selvas tropicais; Mae Jemison, ilustrada no espacio e rodeada de distintos planetas; Asima Chatterjee, rodeada de caixas de fármacos polos seus avances en tratamentos contra a malaria e o cancro; Ángela Ruiz Robles, acompañada de referencias á Enciclopedia Mecánica, precursora do libro electrónico; Katherine Johnson, simbolizada con planetas e estrelas polas súas achegas ás misións espaciais da NASA; Hedy Lamarr, representada con ondas e sistemas de comunicación; Marie Maynard Daly, cunha ratiña de laboratorio e un corazón como icona de saúde cardiovascular; Ada Lovelace, simbolizada con algoritmos e engrenaxes e Jeanne Baret, representada cunha buganvílea, planta descuberta por ela nunha das súas expedicións polo mundo en barco.

     A actividade permitiu unir creatividade e coñecemento científico, visibilizando o papel fundamental das mulleres na historia da ciencia e fomentando referentes femininos entre o alumnado.

Concurso de microrrelatos

 "Abondan moi poucas palabras para dicir moito. Para expresar medos e alegrías, para compartir arelas e contar o que nos mexe o corazón, no íntimo ou no colectivo. Para narrar os grandes temas da vida, da literatura universal. Acadar a máxima expresión no mínimo número de palabras é toda unha arte da escritura."

   A Real Academia Galega e PuntoGal promoven a novena edición do Concurso de microrrelatos, dirixido a persoas de todas as idades. Cada participante poderá concorrer con ata dúas historias dun máximo de 200 palabras na categoría que lle corresponda: infantil (ata 11 anos), xuvenil (de 12 a 17 anos) e adultos (a partir dos 18 anos). 

     Todos os detalles da convocatoria poden consultarse en relatos.gal onde está habilitado o formulario para presentar os textos ata o 28 de febreiro.

     Animamos a toda a comunidade educativa a participar nesta proposta!

Desexos de paz

 

    Para conmemorar o Día da Paz e a Non Violencia, a semana pasada gravamos na biblioteca un vídeo no que o alumnado de 1º e 3º participou expresando os seus desexos, reflexións e mensaxes en favor da paz e en contra dos conflitos que existen no mundo.

     Cada alumno e alumna escribiu na materia de Lingua Galega un desexo pola paz e achegou a súa voz a esta proposta que reflicte a súa ilusión de vivir nun mundo máis xusto, pacífico e respectuoso.

O vídeo elaborado proxectámolo na entrada do centro durante o recreo do pasado venres.

Obradoiro de escritura expresiva

     O alumnado de 1º da ESO participou nun obradoiro de iniciación á escritura expresiva, dirixido por Marisé Barreiro e promovido pola biblioteca en colaboración co departamento de Lingua Castelá. Nas distintas sesións achegámonos á escrita desde unha perspectiva diferente á habitual, entendéndoa como un espazo de liberdade no que plasmar a nosa propia experiencia sen a preocupación inmediata pola ortografía, a gramática ou o estilo.

     O obxectivo principal da actividade foi descubrir que a escritura vai máis aló do ámbito académico e pode converterse nunha ferramenta de diálogo con nós mesmos, que nos axuda a coñecernos mellor mediante esta práctica persoal e reflexiva.

Torneo de xadrez

 A partir do día 2 de febreiro celebraremos durante os recreos dos mércores un torneo de xadrez na biblioteca. O alumnado, profesorado e persoal non docente interesado en participar, pode pasar pola biblioteca para inscribirse.