Miserábeis na MOTESMO

     O noso centro participou o pasado martes na MOTESMO (Mostra de Teatro no Ensino Secundario do Morrazo) coa obra Miserábeis. O Musical, unha montaxe que emocionou ao público grazas ao compromiso, á entrega e ao enorme traballo realizado tanto polo alumnado coma polo persoal docente e non docente implicado no proxecto.

     Esta adaptación da obra de Víctor Hugo, que xa foi representada anteriormente en escenarios de Cangas, Bueu e Pontevedra, consolídase como unha proposta artística e educativa de grande impacto e constitúe unha firme aposta pola educación en igualdade mediante unha aprendizaxe cooperativa e interdisciplinar. Ao longo da representación trátanse cuestións como as liberdades, as desigualdades sociais, a coraxe, a revolución ou a defensa dos dereitos das mulleres.

     Desde o IES Illa de Ons queremos felicitar a todas as persoas que formaron parte desta experiencia e agradecer a excelente acollida do público. A participación na Motesmo supón unha oportunidade para compartir cultura, crear comunidade e seguir demostrando o grande potencial educativo e humano do teatro.

Podcast Radiolibros Ons

      Temos unha novidade moi especial no instituto, nace un novo podcast pensado para acompañar as vosas horas de lectura ao longo da semana. Será un espazo para espertar a curiosidade, descubrir novas historias e atopar recomendacións que vos poidan levar ao voso próximo libro favorito.

     Non podiamos escoller mellor momento para comezar xa que esta semana celebramos o Día do Libro. Ao longo das vindeiras xornadas publicaremos diferentes episodios con recomendacións, curiosidades e fragmentos literarios que merecen ser escoitados con calma.

    Aí van os primeiros podcast!

Semana da Poesía

    As pasadas semanas celebramos o Día da Poesía baixo lema “Poesía eres tú”. Entre outras actividades organizamos un recital poético colectivo no que as voces do alumnado, profesorado e persoal non docente do noso centro, acompañadas de música en directo, deron vida a textos de autores e autoras contemporáneos como Fran Pintadera, Sara Búho, Javier García Rodríguez, Montse Villar ou Manu Erena, entre outros. Un dos momentos máis especiais foi a homenaxe a Montse Villar, antiga compañeira do noso centro, á que o profesorado dedicou unha parte do recital cunha selección dos seus poemas.

    Outra das actividades programadas foi un encontro literario con Defreds, quen compartiu co alumnado a súa experiencia como escritor, falando do seu percorrido, das súas inspiracións e do proceso creativo. Na celebración tamén houbo espazo para a creación, a propia Montse Villar impartiu un obradoiro de creación poética no que o alumnado puido explorar a súa voz interior e experimentar coa linguaxe poética. Pola súa banda, Marisé Barreiro guiou un obradoiro de escritura expresiva, no que se traballaron emocións, lembranzas e vivencias persoais como punto de partida para a escrita.

     Como remate destas xornadas tivemos a sorte de contar cun obradoiro de Hip-Hop, impartido polo artista García MC, no que o alumnado traballou a rima, o ritmo e a composición de letras de rap, descubrindo novas formas de expresión poética máis próximas ao seu día a día.

Poesía eres tú

     Estes días o IES Illa de Ons estivo a organizar a Semana da Poesía baixo o lema Poesía eres tú, unha proposta que pretende achegar o alumnado ao xénero poético. Desde as materias de linguas os rapaces e rapazas implicáronse na elaboración de videopoemas e na creación de caligramas a partir de textos poéticos. Esta programación completarase cun recital musicado, no que fusionaremos poesía e música, contando coa participación de alumnado, profesorado e persoal non docente.

      Remataremos a semana cunha serie de encontros literarios e obradoiros creativos nos que distintas autoras e autores compartirán as súas experiencias e o alumnado poderá experimentar con diferentes recursos estilísticos e explorar a súa propia voz.

Videopoemas

    O alumnado de 3º da ESO, na materia de Lingua e Literatura Galega, mergullouse as pasadas semanas nunha actividade de creación de videopoemas, unha proposta que combina poesía e linguaxe audiovisual. 

    A partir dun texto literario escollido libremente, cada estudante creou unha peza propia na que incluíu un texto escrito, imaxes e elementos sonoros como o recitado e a música. Ademais, traballouse a importancia de non só sumar estes elementos, senón de integralos de maneira coherente para transmitir unha mensaxe clara. O resultado final amosa unha forma de achegarse á poesía desde unha perspectiva creativa e audiovisual.

Sara Torres

Leire Fernández

Laura Agulla

Raúl Aguete

Mateo Parada

Óliver Menduíña

Mara Martínez

Mauro Curra

Aitor Álvarez

Día do Cómic

    O 17 de marzo conmemórase o Día do Cómic en homenaxe ao inicio da publicación da lendaria revista TBO, que deu nome ao fenómeno de lectura de banda deseñada en España. Na biblioteca do noso centro queremos celebrar esta data cunha proposta creativa para todo o alumnado, un concurso de debuxo de personaxes literarios levándoos ao estilo cómic.

    Os deseños gañadores converteranse en marcapáxinas imantados para agasallar no Día do Libro.

• Prazo de entrega: 6 de abril

• Lugar: Biblioteca do centro

• Formato: Debuxo en papel (recomendado A5)

• Técnica: Libre

Anímate a participar!!!

Diarios de lectura

     No noso centro educativo estamos a impulsar unha iniciativa para fomentar o gusto pola lectura a través dun diario de lectura. Nel, o alumnado non só recolle a sinopse dos libros que vai lendo, senón que tamén anota reflexións persoais, pensamentos que lles xorden a partir da historia, citas que lles resultaron especialmente significativas e outros detalles que lles axudan a conectar coa lectura dun xeito máis profundo. Este proceso converte cada libro nunha experiencia máis consciente e persoal, favorecendo a comprensión lectora, o pensamento crítico e a expresión escrita.