Foto biblioteca

Foto biblioteca

26/06/21

Despedimos o curso

     Despois dun duro ano de pandemia, no IES Illa de Ons quixemos despedir o curso ofrecendo ao noso alumnado interesantes e variadas propostas de actividades: sendeirismo, baixada en bicicleta polo monte, obradoiros de ilustración con Luis Davila, Marc Taeger e Joshua Acuña, taller de poesía visual con Lois Gil Magariños, obradoiro de hip-hop impartido por Serxio García, proxección de curtametraxes seleccionadas polo FIC Bueu no Centro Social do Mar, actividade “Orientarse no mar” no Museo Massó e un acto de graduación para despedir ao alumnado de 4º de ESO, que este ano remata a súa etapa educativa no noso centro. 

     O seguinte vídeo resume estas entretidas xornadas.



22/06/21

Adiviña, adiviñanza…

      Mañá comezan as vacacións e desde a biblioteca queremos desexarvos un feliz verán e animarvos a realizar actividades variadas neste tempo de lecer: pasear, ler, facer deporte, ver cinema e teatro, cociñar, escoitar música, escribir, debuxar, xogar e conversar coas amizades e a familia, resolver pasatempos…

     Podedes comezar por atopar as solucións a estas adiviñas, creadas polo alumnado de 2º ESO coa profesora Amalia Graña, a partir de distintos recursos expresivos: comparacións, metáforas, personificacións, paradoxos…






18/06/21

Entrega de libros asinados

      Hoxe foron entregados na Biblioteca, os premios acadados polo alumnado de 2º ESO no Kahoot sobre Xela Arias proposto por Anxo Rajó na súa visita polas Letras Galegas.

   Xoán Rodríguez, coordinador do Equipo de Dinamización da Lingua Galega, entregou a Gael, Enara, Antón, Lara, Carlota, Rodrigo, Miguel T., Brian, Miguel B., Marta, Sara, Cristina, Inés e Alba cadanseu libro dedicado polo propio Anxo, autor da biografía Xela Arias. Poeta e tradutora.

17/06/21

Actividades remate de curso

     A próxima semana remata o curso escolar e a biblioteca está a colaborar cos demais departamentos e a dirección do centro na planificación dunha serie de actividades para despedirnos. No seguinte cartel mostramos as saídas que faremos e os estupendos artistas que visitarán o Illa de Ons os vindeiros luns e martes. 

    A pasalo moi ben!



14/06/21

Lecturas para o verán

      Lembramos ao alumnado, profesorado e persoal non docente, que a biblioteca fará préstamos para este verán. Aínda que durante o curso emprestamos un máximo de tres exemplares á vez, nas vacacións o alumnado poderá levar ata cinco libros que deberá devolver en setembro.

     Ademais das novidades de temáticas diversas que durante este curso fomos adquirindo, recordámosvos que as seccións de igualdade e inclusión teñen tamén títulos moi recentes e interesantes.

     Entre as lecturas que recomendamos temos estes dous títulos asinados polos propios autores, agasallo da Librería Miranda de Bueu: 

     Visitantes da estrela vermella, de Tomás González Ahola, e A caída de Guiomar, de Alba Rozas, foron presentados nun acto organizado pola Libraría Miranda o pasado día 12 no Centro Social do Mar de Bueu. Estes dous libros forman parte da colección "A miña primeira novela de..." fundada por Contos Estraños Editora. 

Moitas grazas!

10/06/21

Club de lectura con Montse Villar

     As pasadas semanas, o club de lectura centrou a súa actividade arredor da obra poética da súa coordinadora, Montse Villar. Montse, ademais de profesora de Lingua e Literatura Castelá, é unha grande poeta, licenciada en Filoloxía Hispánica e Filoloxía Portuguesa, profesora tamén de ELE (Español como Lingua Estranxeira), autora de materiais e manuais didácticos, conferenciante e formadora de profesores, tradutora de autores portugueses, colaboradora en blogues e encontros literarios...


       Montse falounos da súa poesía, explicounos algunhas das súas experiencias neste campo e contou anécdotas que viviu nos seus múltiples encontros literarios. Ademais de ler algúns dos seus poemas, os alumnos e alumnas seleccionaron os que máis lles sorprenderon, explicando a continuación a autora a orixe deles. Tamén amosou algúns dos seus poemas obxecto e animou ao alumnado a crear outros para as vindeiras xuntanzas.

     Moitas grazas pola túa xenerosidade!

02/06/21

20 Aniversario de Umbrela

     Aló polo ano 2001 nacía a revista Umbrela da man do Equipo de Dinamización da Lingua Galega do IES Illa de Ons. Para celebrar o seu aniversario organizamos unha exposición cunha escolma dalgúns dos materiais publicados durante estes 20 anos, nos que Umbrela rexistrou as vivencias da nosa comunidade educativa. 

     Na editorial do último número da revista, que está a piques de publicarse, Xoán Rodríguez rememora algúns dos episodios da súa historia:

01/06/21

Cartas e fotografías gañadoras nos concursos da ANPA

    Hoxe tivo lugar, na biblioteca do centro, o acto de entrega de premios aos gañadores e gañadoras do I Concurso de Cartas de Amor e Amizade e do IV Certame de Fotografía "Obxectivo Bueu", organizados pola ANPA en colaboración coa Biblioteca. Nesta ocasión foron Mari Nores e Miriam Cabanelas, presidenta e vicepresidenta da ANPA, as encargadas de facer entrega ao noso alumnado dos diferentes premios. 


    Rocío Comedeiro (2º A), Carlota Nores (1º A) e África Álvarez (1º B) foron as autoras das mellores cartas da modalidade A (1º e 2º ESO) e Zulema González (3º A), recibiu o 1º e único premio da modalidade B (3º e 4º ESO).


     No certame de foto resultaron premiadas, na modalidade A, as imaxes de Asier Golobardas (1ºA), Gael Calviño (2ºA), Carla Souto (2ºB), Nuria Rodríguez (1ºA), Alberto Rosales (2ºA) e Alba Otero (2ºC). Na modalidade B os gañadores foron Brais Castro (3ºB), Pablo Loira (3ºA) e Maica Morgado (4ºA).


     Ademais dos xenerosos vales que poderán trocar nos diferentes comercios de Bueu adheridos á ANPA, o alumnado participante no concurso de fotografía recibiu un diploma como recoñecemento ao seu traballo.
     Noraboa a todos e a todas!

30/05/21

Entrega de premios Concursos ANPA

      Lembramos ao alumnado participante no I Concurso de Cartas de Amor e Amizade e no IV Certame de Fotografía "Obxectivo Bueu", que o vindeiro martes 1 de xuño, ás 11:30 h, terá lugar na biblioteca do IES Illa de Ons a entrega dos premios. Para poder respectar co límite de aforo establecido, pregamos que só asista a este acto o alumnado que presentou traballos nalgunha das dúas convocatorias. 

     Moitas grazas pola vosa colaboración.

29/05/21

Biblioteca virtual

     Continuamos actualizando a biblioteca na aula virtual do IES Illa de Ons. Recordade que tedes distintos materiais á vosa disposición: acceso a lecturas dixitalizadas, cultura aberta, audiolibros, páxinas de interese para as distintas materias, xogos en liña...





23/05/21

22 segundos

 Hai uns días, unha parte do alumnado de 3º ESO reuniuse na biblioteca para debater sobre distintos aspectos do libro 22 segundos, de Eva Mejuto. Xoán Rodríguez, profesor de Lingua Galega e Literatura, actuou como moderador desta actividade na que participaron Pedro, Zulema, Pablo, Víctor, Lois, Manuel, Breixo, Noemí, Brais, Noel, Fran e Álex. Moitas grazas a todos e todas pola vosa participación.


 Ficha do libro publicado por XERAIS

O que non se di é coma se non existise, afirmara o avó un día, e xa ía sendo hora de existir. Ata ese momento só vivira de portas para dentro. Agora xa non había marcha atrás. A cámara pedíalle que falase."Son Álex, un mozo transexual. Abro este vlog para compartir con vós a miña vida. Quen me coñeza e estea a ver este vídeo entenderá moitas cousas, ou mesmo non comprenderá -ou non quererá comprender- nada. O distinto asusta, dá vertixe porque obriga a cuestionarse tantas cousas... E por iso fago este vídeo, porque non quero ter máis medo, nin vergoña de ser quen son."Antes de que lle dese tempo a pensar, conectou a cámara co ordenador. Vinte e dous segundos. Ese foi o tempo que tardou o arquivo en subir á rede. "22 segundos" relata, en primeira persoa, anacos da infancia e adolescencia dun mozo transexual que, desde os primeiros anos sabe -sen poñerlle etiquetas- que a súa identidade de xénero non coincide co sexo que lle asignaron ao nacer. Unha obra que busca visibilizar, desde a empatía, un colectivo de persoas historicamente silenciadas e denigradas que loita por que as leis -e a sociedade- deixen de consideralas enfermas.

22/05/21

Xela Arias. Poeta e tradutora.


     O venres tivemos unha visita moi especial no Illa de Ons. Anxo Rajó, exprofesor de Lingua Galega e Literatura do noso centro, veu presentar o seu libro Xela Arias. Poeta e tradutora, da editorial Ir indo. Anxo achegounos a Xela dun xeito moi emotivo, facendo un percorrido pola súa vida desde a infancia en terras luguesas e pola súa obra no eido da literatura como filóloga, poeta e tradutora. A continuación propuxo ao alumnado de 2º ESO a participación nun Kahoot sobre a autora e asinou libros aos gañadores e gañadoras.

     Anxo, ademais de escritor e profesor no ensino secundario, foi tamén coordinador da Enciclopedia Universal Galega, do Dicionario Enciclopédico Galego Universal e colaborador no Dicionario de galego de Ir Indo; é membro da Fundación Premios da Crítica Galicia e traballou na sinalización de zonas naturais e históricas deseñando unha interesante rede de roteiros de grande valor medioambiental, algúns deles no noso concello.      

     Moitas grazas pola túa visita, Anxo. Estrañámoste!

17/05/21

Feliz día das Letras Galegas!

     Hoxe, Día das Letras Galegas, recordamos a Xela Arias, unha voz “singular, transgresora e comprometida” en palabras da Real Academia Galega, que renovou nos anos 80 a poesía galega e foi pioneira na tradución de clásicos. Esta semana traballaremos arredor da figura da escritora, poeta e tradutora con distintos materiais adquiridos pola biblioteca. 

   “Agora na primavera fixen nove anos. Son moitos para non procurar nada de proveito na vida, así que vou escribir un libro"

E o venres... agárdanos unha sorpresa!

10/05/21

A roupa non ten xénero

     Alumnado, profesorado e persoal non docente do IES Illa de Ons secundou, a semana pasada, a iniciativa "A roupa non ten xénero", promovida por un grupo de rapazas do IES Johan Carballeira e que reivindica a liberdade de expresión e a identidade de xénero. O proxecto, que leva desenvolvéndose no centro veciño desde o día 4 de novembro, dá continuidade a unha protesta a nivel nacional en apoio a Mikel, un alumno dun centro educativo do País Vasco que foi discriminado por un profesor por asistir a clase con saia. Esta actividade final, á que todos e todas as participantes acudimos con saias ou vestidos, contou tamén co apoio do alumnado e profesorado do CEIP Plurilingüe A Pedra, o alcalde de Bueu e outros membros do concello. 

     Ademais do manifesto lido polas rapazas e un fermoso texto reivindicativo escrito por Antía Novas (exalumna do noso centro), o alumnado de 3º ESO do Illa de Ons interpretou unha batucada e entre todos e todas fixemos pintadas na rúa e elaboramos, con prendas de roupa "recortables", unha pancarta que decoramos con proclamas en favor da igualdade, o respecto e a liberdade.

06/05/21

Teatro e poesía no club de lectura

     Neste trimestre, a coordinadora do club de lectura Montse Villar, seleccionou os seguintes títulos de teatro e poesía para traballar co alumnado:

O principiño e o asteroide de ferralla, de Xavier Frías Conde.

 Antes da lectura desta pequena peza teatral, traballouse a imaxe de O Principiño de Saint-Exupéry para, despois, falar dos elementos dunha obra de teatro.  Comentamos o significado da obra, a imaxe da ferralla no espazo, a contaminación na que vivimos e a figura do principiño como fío condutor do texto.

     Para completar a actividade convidamos ao autor a visitar o noso centro o día 29 de abril. Xavier Frías falounos da súa obra infantil e xuvenil e conversou co alumnado, resolvendo todas as súas dúbidas. Foi unha xornada literaria moi enriquecedora na que participaron os cursos de 1º de ESO e o alumnado de 2º ESO que forma parte do club de lectura.


Poemas para dibujar en voz alta, de Gabriela Zárate Carrió.

Trátase dunha colección de poemas do cotiá que convidan ao lector a pintalos e titulalos: a bicicleta,  a familia, as diferenzas... 


     Escolléronse seis poemas que os alumnos e alumnas leron e ilustraron, debuxos que foron enviados á propia autora. Onte tivemos o pracer de conversar con ela a través dunha videoconferencia, durante a cal transmitiu aos rapaces as súas inquedanzas literarias e sociais e completou comentando algún dos poemas do libro. Os alumnos e alumnas leron en voz alta os seus poemas preferidos e agradeceron a amabilidade da poeta.

     Deixámosvos con algunhas imaxes desta conexión.


04/05/21

Maia

    O xoves pasado, os rapaces e rapazas de 3º ESO, coa colaboración do profesorado e do persoal non docente, elaboraron un maio con forma de muller. 


     Para facer a nosa Maia partimos dunha estrutura con forma cónica construída con listóns de madeira e unha serie de aros de diferentes tamaños. Para vestila utilizamos fiúncho, xesta, tuia, espadana, bugallas, laranxas, calas, pampullos, margaridas e outra serie de flores, recollidas tanto o día anterior coma durante esa mesma xornada por toda a comunidade educativa. 


    O sábado día 1 de maio a nosa Maia formou parte dunha mostra na Praza Massó de Bueu, xunto con outros maios elaborados polos demais centros educativos do concello e un enorme maio con forma de polbo feito pola Asociación de Alfombras de Bueu.

02/05/21

“Palabrogramas”

 O alumnado de 2º da ESO vai sobrado de creatividade. Mirade como xogaron coa forma gráfica das palabras para crear estes "palabrogramas" na materia de Lingua Galega.








26/04/21

Aí vén o maio!

     Achégase o mes das flores e este ano elaboraremos un maio no noso centro do que xa temos o armazón feito. O alumnado de 1º ESO estivo a traballar na letra de cantigas coa profesora da materia de Lingua Galega e Literatura, Amalia Graña, así que xa temos a festa asegurada!

23/04/21

Día do Libro a ritmo de rap

     Para conmemorar o día de hoxe, propúxoselle ao alumnado de 3º ESO, na materia de Lingua e Literatura Castelá, traballar a temática dos libros na composición da letra dunha canción. A ritmo de rap debían elaborar unha serie de rimas arredor da lectura, dun libro, dun personaxe, dalgún autor ou autora... e acompañalas dunha base musical.

     O alumnado está a editar con este material distintos vídeos que proxectaremos no centro a vindeira semana. Polo momento compartimos convosco algunhas letras destes artistas hiphoperos.

El Quijote
Telmo e Gabriel (3ºESO B)


Desde Galicia hasta la Mancha,
con Don Quijote y Sancho Panza
conquistando todo con su lanza.

Después de leer tanto, 
este hidalgo se creyó que era un escudero,
y con su rocinante y su galgo
fue en búsqueda de un compañero.

Cuando el caballero iba por el camino,
se encontró con un campesino
y le siguió el rollo,
porque pensaba que llevaba más de un vino.

Se encontró a unos gigantes
que confundió con unos molinos,
aún eran bastante, bastante grandes.
Estaban a lo alto, donde ya no había pinos.

La siguiente aventura fue en el puerto,
donde Quijote vio a dos frailes,
otro de sus pensamientos inciertos,
con sus grandes y negros hábitos textiles.

El Quijote no se cansa,
seguiremos sus andanzas,
con Sancho siempre fiel,
no nos aburriremos de él.

Los libros que leímos
Álex (3ºESO A) e Fran (3ºESO B)


Hoy vamos a hablar
sobre la lectura,
que es una buena forma
de aprender cultura.


Vamos a hablar
de los libros que leímos,
que pensamos que eran un tostón
y al final nos divertimos.


El primero que leímos
fue El sueño de Berlín,
unha pareja de niños
disfrutando por ahí.


El siguiente que leímos
fue El rostro de la sombra,
un drama terrible
con la madre de su novia.


El tercero fue el de Mentira,
que tiene un primo traficante
contra Los Medina.


El cuarto que leímos
fue El impostor,
un niño con su tío
que le enseña lo peor.


El quinto que leímos
fue el de Rebeldes,
dos pandillas enfrentadas
reventándose los dientes.


El sexto que leímos 
fue El príncipe de la niebla,
con una familia en la playa
comienza la misteriosa novela.


Esto ha sido todo,
espero que os haya gustado.
Este es nuestro rap,
y ya hemos terminado.

20/04/21

Libros voadores

 Intercambio de libros no Illa de Ons!



18/04/21

Concursos ANPA

      A biblioteca, en colaboración con ANPA, volve convocar este ano o concurso de cartas de amor, amizade, admiración, desamor... dirixido a todo o alumnado do IES Illa de Ons e que o ano pasado foi suspendido por mor da pandemia. Ademais, reformulamos as bases para o concurso de fotografía, proposto no trimestre pasado e con moi baixa participación, que nesta edición será de temática libre.

     A continuación podedes consultar as bases de ambos concursos.







27/03/21

Aquí hai debate!

     As redes sociais non están pensadas para os nenos e as nenas, por iso a idade mínima de acceso establécese nos 14 anos para a maioría delas pero, o certo, é que en clase todo o mundo ten conta nunha ou en varias redes sociais. Moitos menores acceden a diario a redes sociais e iso ten consecuencias... É bo ou é malo? Debemos permitilo ou non? Aquí HAI DEBATE!

      O alumnado de 1º ESO debateu na biblioteca sobre o acceso libre ás redes sociais por parte dos menores. Orientados pola profesora da materia de Valores Éticos, Iolanda Veloso, organizáronse os dous equipos de debate que tiveron que procurar información para preparar os seus argumentos, un xurado que valorou ao remate a mellor defensa das dúas posicións e dous moderadores que explicaron as normas e xestionaron as quendas de intervención. 
     
     Deixámosvos cun vídeo que resume esta actividade.



26/03/21

A poesía serve para...

     Para vivir aventuras, para salvar vidas da mediocridade, para levala no peto... Os alumnos e alumnas de 1º ESO descubriron esta semana, a través dos enredos do gato poeta de Fran Alonso, outro xeito de ollar a poesía. Orientados pola profesora de Lingua Galega e Literatura, Amalia Graña, elaboraron poemas colectivos cos que mostran a infinidade de cousas para as que pode servir a poesía.




Está claro que o gato de Fran Alonso é un poeta, pero o alumnado de 1º ESO do Illa de Ons tamén!

25/03/21

Moita xente pequena, en moitos lugares pequenos, cultivarán pequenos hortos.

     Pois chegou o día, hoxe o alumnado participante no club de lectura trouxo sementes, plantas e pequenas árbores para plantar no horto do instituto. Esta actividade complementa a lectura do relato La guerra esperada, do libro de Gustavo Duch Mucha gente pequeña


21/03/21

A guerra esperada no Día dos Bosques

     O noso Club de Lectura Ons, a illa do tesouro, estivo centrado estas semanas na lectura de Moita xente pequena, de Gustavo Duch; en concreto no relato A guerra esperada.

     Os alumnos e alumnas leron o conto e, sen entregarlles o final, tiveron que imaxinar de que tipo de bombas falaba a historia e posibles finais para esta. Despois de aportar todos e todas a súa versión, lemos o final e comentámolo. Acordamos que cada membro do club plantaría unha semente na súa casa e, cando esta xerminase, traeriámola para plantala no horto que comezamos a recuperar no noso centro. Esta semana, para conmemorar o 21 de marzo Día dos Bosques e Día da Poesía, plantaremos a nosa semente e identificaremos os nosos exemplares con pequenos carteis cos nosos nomes.

A guerra esperada. Ilustracións de Sara Plaza e voz de Vicky Peña 
Pol · len edicións

07/03/21

Exposición 8M - Mulleres da Idade Media

       Como xa comentamos en entradas anteriores, este trimestre o alumnado de 1º ESO e 2º ESO estivo a traballar arredor de vida e a obra de sete mulleres que tiveron grande relevancia na Idade Media. O alumnado de 2º ESO B e 2º ESO C, tras participar nun obradoiro de podcast, encargouse de guionizar,  gravar e editar unha serie de audios centrados nestas sete figuras femininas. O alumnado de 2º ESO A procurou información sobre as súas historias e maquetouna nunha serie de trípticos onde, ademais, incluíron códigos QR cos podcast dos seus compañeiros e compañeiras e unha imaxe das cabezas das mulleres en volume, elaboradas polo alumnado de 1º ESO.

      O Equipo de Igualdade do centro organizou unha exposición con todo este material co fin de que os membros da comunidade educativa poidan visualizar e escoitar este completo traballo realizado arredor de Wallada bint al-Mustakfi, Ende, Teodora de Bizancio, Hildegarda de Bingen, Leonor de Aquitania, Irene de Atenas e Trota de Salerno. Ademais repartiranse chapas coas caras de cada unha delas e, tras a visita á exposición, establecerase un debate co alumnado sobre a importancia na historia destas sete mulleres.

     A continuación mostramos o deseño das chapas e os carteis elaborados para a exposición a partir dos trípticos. Podedes escoitar os podcast descargando a aplicación Ivoox e escaneando os códigos QR que atoparedes en cada un dos carteis.