Agasalla libros polo Nadal

     Con vistas ao Nadal, na biblioteca preparamos un recuncho moi especial para inspirar as lecturas destas datas tan sinaladas. Elaboramos un panel con recomendacións lectoras para agasallar, no que se poden atopar títulos das guías do EDL do Morrazo xunto con algunhas das últimas adquisicións da nosa biblioteca, pensadas para todos os gustos e idades.

     Este espazo foi decorado cunha serie de elementos realizados co plotter de corte de Polos Creativos, combinados con figuras de papiroflexia. Unhas fermosas ventás ás que asomarse a mirar e escoller unha boa lectura para estas festas.

     Onte, neste mesmo recuncho decorado, apareceron uns misteriosos agasallos destinados ao voluntariado da biblioteca. Semella que os trasnos andiveron a facer das súas, lembrándonos que o Nadal tamén é tempo de agradecer e recoñecer o traballo de quen sempre está disposto a botar unha man.

Mi hermana vive sobre la repisa de la chimenea

      O alumnado de 2º de ESO participou nun club de lectura arredor do libro Mi hermana vive sobre la repisa de la chimenea, da escritora Annabel Pitcher. Durante a sesión compartiron a súa opinión sobre a lectura e expresaron os sentimentos e emocións que espertou neles a historia. A continuación, sacaron distintos obxectos dun carriño da compra e asociaron cada un deles aos diferentes personaxes do libro, reflexionando sobre o seu significado. Para rematar a sesión, e tomando como punto de partida un fragmento do libro, traballaron en pequenos grupos na creación dunha nova historia, uns encargáronse de elaborar o nó, mentres que outros imaxinaron o desenlace. Nunha fase posterior, xuntarase o traballo de todos os grupos para dar forma a unha nova narración colectiva creada a partir da lectura compartida.

Guías de lectura EDL do Morrazo

     Un ano máis, a coordinadora de Equipos de Dinamización Lingüística do Morrazo achega, a través de distintas guías, un listado de lecturas recomendadas para infantil, primaria, secundaria e persoas adultas. 

Agasalla galego, é a túa lingua!

Actividades contra a violencia de xénero

       Co obxectivo de sensibilizar e implicar a toda a comunidade educativa na loita contra a violencia machista, este ano desenvolvemos no centro un conxunto de actividades que puxeron o foco na memoria, na reflexión e no compromiso colectivo.

     Durante o recreo, na entrada do centro proxectáronse dous vídeos, un dun contador co número de denuncias por violencia machista rexistradas en Galiza nos últimos dez anos, e outro elaborado polo alumnado o pasado curso por estas datas, co fin de tomar conciencia da dimensión real desta lacra social.

    Instalouse nunha parede un mural composto por bolboretas elaboradas polo alumnado, cada unha delas portando o nome dunha muller asasinada por violencia machista no último ano. Esta intervención tiña tamén como finalidade homenaxear as irmás Mirabal, símbolo da resistencia e da loita contra a opresión, sobre as que o alumnado puido coñecer máis a través da proxección dun vídeo coa súa historia.

    Ao longo da semana, o fío musical do centro estivo formado por unha selección de cancións que abordan a violencia machista, ofrecendo así un acompañamento sonoro que convidou á reflexión e ao debate nas aulas.

    O alumnado de 4º de ESO participou activamente creando marcadores de páxinas e chapas, nas que plasmaron mensaxes de rexeitamento á violencia de xénero e de apoio á igualdade. Estes obxectos foron distribuídos entre a comunidade educativa e noutros centros educativos da contorna.

    Finalmente, a biblioteca e outros espazos do edificio foron decorados con citas de mulleres célebres que alzaron a súa voz contra o machismo, permitindo que o alumnado, profesorado e persoal non docente atopasen, nos seus tránsitos polo centro, mensaxes de forza, valentía e reivindicación.

Culturgal

Os días 28, 29 e 30 de novembro volve a Pontevedra Culturgal, a Feira das Culturas Galegas. Ademais dos numerosos expositores, o público de todas as idades poderá gozar de variadas actividades: concertos, espectáculos, contacontos, obradoiros, etc.

As entradas poden adquirirse en liña a 3€ o público adulto (5€ en despacho de billetes) e a 2€ o público xuvenil ata os 15 anos (3€ en despacho de billetes). Os menores de 3 anos poderán acceder gratuitamente. Tamén hai posibilidade de mercar abonos e paquetes familiares.

Programación completa

E se deixamos de contar vítimas…?

Imaxe da campaña 25N do Concello de Pontevedra 

Bueu en imaxes

     O Concello de Bueu, coa colaboración do Festival Internacional de Cinema de Bueu (FICBUEU), busca imaxes antigas para constituír un arquivo fotográfico da vila, unha iniciativa que ten como obxectivo recuperar e conservar a memoria fotográfica.

     O proxecto nace coma unha forma de reivindicar a memoria individual e colectiva, de analizar a historia local a través das imaxes e de tentar construír un fondo que poida estar a disposición de calquera persoa que o desexe consultar.

     Aínda que o obxectivo deste ano é recompilar imaxes relacionadas con costumes e tradicións, a idea é poder desenvolver a actividade nos próximos anos con outras temáticas.

     Animamos ao noso alumnado e ás súas familias a participar nesta proposta achegando as súas fotografías ata o noso centro para xestionar a súa dixitalización, ou os luns de 10 a 19 horas na entrada da Biblioteca Municipal de Bueu. A data límite de recollida de imaxes é o 26 de xaneiro.

Trebellos con voz

     Neste Mes da Ciencia o noso centro decidiu retomar, co alumnado de 1º ESO, as visitas á exposición "Trebellos con voz", un proxecto multidisciplinario que abrangue a toda a comunidade educativa do IES Illa de Ons e que supón unha viaxe no tempo ao ano 1998, cando se abriu o centro, mostrando a tecnoloxía que se empregaba entón. 

     O proxecto, iniciado o curso pasado con esta exposición e coordinado polos Equipos de Dinamización da Lingua Galega e Polos Creativos, dos que a Biblioteca forma parte, continúa neste curso coa programación de actividades interdisciplinarias coas que se pretende que a lingua galega sexa unha ferramenta de comunicación moderna e válida no mundo das tecnoloxías da información e da comunicación. Está iniciativa implica a todo o alumnado de 1º a 4ª da ESO, apostando polo traballo cooperativo entre estudantes de diferentes idades e niveis e promovendo a aprendizaxe entre iguais.

San Simón

     O pasado venres o alumnado do IES Illa de Ons acudiu ao cine de Seixo para ver a longametraxe San Simón, dirixida por Miguel Ángel Delgado.

 A actividade, organizada pola ANPA e coa colaboración do centro, adquire unha relevancia particular ao enmarcarse na conmemoración do 50 aniversario da morte do dictador Francisco Franco. O filme aborda un capítulo escuro e silenciado da historia, o funcionamento da Illa de San Simón como campo de concentración franquista, e visibiliza o horror e a represión sufrida polos presos. 

     Tal e como explica o seu director, San Simón é froito dun exhaustivo traballo de investigación con historiadores, documentalistas e familiares das vítimas, contou coa participación no equipo artístico e técnico de fillos e netos dalgúns presos, o que subliña a necesidade de transmitir esta memoria ás novas xeracións, evitando o esquecemento e contribuíndo a un relato máis completo do pasado.

Premios Literarios Minerva

     Un ano máis o Colexio M. Peleteiro convoca os Premios Literarios Minerva, nos que poderán participar alumnos e alumnas de 3º e 4º da ESO, Bacharelato e FP que cursen estudos en Galicia, e non teñan cumpridos os 20 anos o 31 de decembro de 2025.

   Os traballos deberán ser orixinais e inéditos, escritos en lingua galega e poderán concorrer nas modalidades de poesía (un conxunto de tres poemas, de tema e forma libres) e narración (con extensión máxima de seis folios e mínima de dous mecanografados a dobre espazo e de tema libre).

     Concederanse tres premios en cada modalidade, de 800, 400 e 250 € respectivamente, medalla conmemorativa do certame e publicación das obras galardoadas nun libro editado polo Colexio M. Peleteiro. Se na opinión do xurado a calidade das obras así o requirise poderán outorgarse accésits. Os premios poderán declararse desertos.

      O prazo de presentación remata o día 14 de xaneiro.

Unha xornada terrorífica

      O luns da pasada semana celebramos no noso centro o Samaín. No recreo da mañá tivo lugar un velorio na biblioteca, no que despedimos ao defunto Adrián Ticipado Palmou, con varios discursos elaborados polo alumnado de 1º ESO e cos prantos dun grupo de choronas. Na entrada do centro publicamos unha serie de noticias terroríficas, redactadas polo alumnado de 2º ESO a partir da lectura de relatos de terror de diversos autores.

     Pola tarde, o alumnado de 4º ESO aterrorizou ao resto dos estudantes nunha pasaxe arrepiante, na que eles mesmos interpretaron distintos personaxes e elaboraron varias escenografías sanguinolentas. Ademais celebramos no pavillón os habituais concursos de doces e de disfraces de terror. Noraboa a todos/as participantes! 

CONCURSO DE DISFRACES GRUPO:

• 3º premio: Carmen Rebollo, Elena Pastoriza, Leyre Sotelo e Noa Gago (2ºA) coa profe Raquel.
• 2º premio: Cloe Santos (1ºA) e Paula Costas (1ºB).
• 1º premio: Noa Otero (3ºA), Laura Agulla e Leire Fernández (3ºB).

CONCURSO DE DISFRACES INDIVIDUAL:

• 3º premio: Borja Freire (2ºA).
• 2º premio: Pablo López (3ºA).
• 1º premio: Iván Souto (2ºB).

CONCURSO DE DOCES:

• 3º premio: Elena Novas (4ºA).
• 2º premio: Yoel Sampedro e Rami García (2º A).
• 1º premio: Hugo Rodríguez (4ºA).

Día das Bibliotecas contra a desinformación

  

    Este ano, o Día das Bibliotecas dedícase á loita contra a desinformación. Co obxectivo de concienciar ao alumnado sobre a importancia de acceder a fontes fiables, contrastar información e desenvolver o pensamento crítico, o xornalista César Rodríguez ofrecerá un relatorio sobre a IA (desInformAción) na biblioteca do IES Urbano Lugrís, de Malpica. Abordará cuestións como que é a desinformación, en que contexto se produce, a IA e a sabedoría das multitudes: algo é certo se se repite moito, imaxes e vídeos: autopistas para a desinformación e facilitará pautas para combater a desinformación clásica e a nova.

     A charla está pensada para alumnado de educación secundaria e emitirase en directo por diferentes canles de La Voz de Galicia e o seu programa educativo (Prensa-Escuela). Poderemos conectarnos hoxe en directo (10:00 horas) coa emisión e seguir o relatorio, así coma enviar preguntas pola canle de YouTube: https://youtube.com/@lavozdegalicia?si=E3pZQS9-cN8lJLv4

     Esta actividade quedará dispoñible en diferentes plataformas para que poidamos acceder ao contido en diferido.

Samaín no Illa de Ons

      Un ano máis o IES Illa de Ons festexará o Samaín con distintas actividades terroríficas. O luns 27 de outubro despediremos, durante a hora do recreo, a don Adrián Ticipado Palmou, cuxa necrolóxica redactou o alumnado de 3º ESO.

   Na biblioteca teremos expostas as noticias elaboradas polo alumnado de 2º ESO a partir da lectura de distintos relatos de terror e cara o final da mañá organizaranse visitas guiadas a un espazo ata agora descoñecido que nunca ninguén esquecerá… 

     Durante a tarde do luns celebraremos o concurso de doces espantosos Monsterchef e o concurso de disfraces de medo, aos que está todo o mundo invitado a participar. Animádevos!

    Se buscas ideas para un disfrace con estilo e historia, podes mergullarte na literatura de terror. Os libros están cheos de monstros, pantasmas e figuras que dan moito xogo, coma o Conde Drácula, elegante e escuro, ou a criatura de Frankenstein, con cicatrices e parafusos incluídos. Outras opcións son Mr. Hyde, o lado escuro de Dr. Jekyll, cun disfrace metade cabaleiro, metade monstro; o Corvo de Edgar Allan Poe, cunha capa negra, plumas e maquillaxe escura; o Home Invisible, con vendas e sombreiro, ou Carmilla, a vampira á que María Solar homenaxea en Adeline.

Obradoiro de Podcast e Radio

     A pasada semana tivemos o a sorte de contar coa visita de Damián Alonso, recoñecido profesional do mundo da comunicación e da dobraxe, que impartiu unha serie de obradoiros de radio e podcast, dirixidos ao alumnado de 1º de ESO e a parte do profesorado e do persoal non docente do Illa de Ons.

     Durante as distintas sesións, que se desenvolveron na aula de Polos Creativos, puidemos iniciarnos na creación de podcasts dunha maneira dinámica e participativa. Damián explicounos como deseñar grellas e guións radiofónicos e deunos pautas para mellorar a locución, coma os cambios de ritmo, de ton ou de intensidade. Tanto alumnado coma profesorado traballamos por parellas na creación dun pequeno podcast, desde a creación do guión ata a súa gravación.

Moitas grazas, agora tócanos a nós poñelo en práctica!

As nosas escritoras

      Desde a nosa biblioteca queremos sumarnos á celebración do Día das Escritoras, facendo visible o labor das mulleres que nos emocionan, nos fan pensar e nos axudan a entender o mundo a través dos libros.

     As autoras galegas ocupan un lugar fundamental nas lecturas do noso centro, desde Rosalía de Castro, Marilar Alexandre, María Victoria Moreno ou Fina Casalderrey ata escritoras máis actuais como Ledicia Costas, Andrea Maceiras, Eva Mejuto, María Reimóndez, Iria Misa, María Solar, Rocío Leira ou Arantza Portabales, que fan da literatura galega un espazo vivo, diverso e cheo de talento.

    Tamén celebramos ás poetas contemporáneas, como Chus Pato, Olga Novo, Yolanda Castaño, Miriam Ferradáns, Montse Villar, Lucía Novas ou Sara Búho, que nos traen unha palabra fonda, necesaria e repleta de beleza.

     A fantasía, a novela xuvenil e a banda deseñada teñen tamén grandes voces femininas: Laura Gallego, Maite Carranza, Care Santos, Joana Marcús, Sonia Mirón, Deborah Ellis, Annabel Pitcher, Alice Oseman ou Raina Telgemeier, que conectan coa mocidade e falan de identidade, amizade, medo, amor e liberdade.

     Na nosa biblioteca tamén hai espazo para as historias clásicas ou universais, como as de Jane Austen, Judith Kerr, Agatha Christie, Astrid Lindgren ou Sylvia Plath, que seguen a inspirar xeracións con voz propia.

    Grazas a todas as mulleres que escriben, por encher o mundo de palabras que abren os ollos, que conmoven e que fan pensar. Na nosa biblioteca, o voso traballo ten valor, espazo e memoria.

Pingas musicais

 

     Estamos de sorte no Illa de Ons, os timbres de entrada, saída e intercambios de clase veñen acompañados desde finais do curso pasado de Pingas musicais 💧🎵. Da selección destas ocúpase un equipo formado, polo momento, por profesorado e persoal non docente, capitaneado polo noso gurú musical Martiño Meira 😎🙌. Como el mesmo explica nun pequeno texto ao que temos acceso na aula virtual do centro, estas Pingas non teñen outra pretensión ca de humedecer os oídos cunha variedade extensa de música popular e tamén de música de culto. Neste sitio da aula virtual poderemos coñecer os intérpretes e os nomes das pezas e tamén beber das pingas acumuladas cada semana até fartar as orellas! 

     Se formas parte da comunidade educativa do IES Illa de Ons e non es usuario ou usuaria da aula virtual, podes solicitar o acceso a este espazo musical na secretaría do noso centro.

HORA DE LER

     Coma todos os anos, comezamos neste mes de outubro coa Hora de ler, vinte minutos que dedicamos diariamente a lectura libre e que imos rotando semanalmente de sesión. Para non esquecer este tempo de pracer lector, colocáronse nos cortizos de todas as aulas calendarios coas horas sinaladas para todo o curso escolar.

FICBUEU 2025

 O pasado venres, o FIC Bueu convidounos a asistir co alumnado de 3º e 4º ESO a unha sesión de proxección de curtas no Centro Social do Mar. 

     Antes de asistir realizamos na aula unha serie de actividades preparadas pola organización, co fin de activar as ideas previas sobre as posibles tramas das curtas. Despois do visionado o alumnado valorou individualmente cada unha das pezas audiovisuais cunha papeleta e, en grupo, debatemos sobre as temáticas tratadas nas distintas curtas así como a linguaxe audiovisual aplicada nalgunha delas. 

Moitas grazas un ano máis ao FIC por convidarnos a gozar desta experiencia.

Poñémonos en marcha!

 

GIF deseñado por Markus Magnusson

      Xa estamos de volta e comezamos un curso máis con moita ilusión e novos proxectos. Nestas primeiras semanas o equipo da biblioteca estivo a planificar algunhas das actividades que temos previsto desenvolver durante o curso e realizou algunhas das tarefas de xestión, como o expurgo do depósito de castelán, a detección de necesidades dos diferentes departamentos para a compra de novos títulos, a catalogación e etiquetado de materiais ou o pegado de códigos de barras.

     Estas son algunhas das novidades adquiridas:

Premios de Dinamización da Lingua Galega

     O Equipo de Dinamización da Lingua Galega e a ANPA do IES Illa de Ons organizaron, un ano máis, o acto de entrega de premios dos certames audiovisuais "Tes un minuto?" e "A foto fala".  Para amenizar esta actividade, alumnas e alumnos de distintos cursos participaron en diversas actuacións coordinadas pola nosa compañeira Teté García. Ademais tivemos a sorte de contar coa colaboración de dous dos rapaces migrantes que viven actualmente en Bueu, que formaron parte da posta en escena dunha das performances.

     Os traballos premiados este ano foron os seguintes:

No Certame de Vídeos “Tes un minuto?”

• Premio 1º ESO: Iria López Graña e Saray Martínez Martínez.

• Premio 2º ESO: Laura Agulla Pastoriza, Leire Fernández Riveiro e Manuel Fernández Paredes.

• Premio 3º ESO: David Dacosta Otero, Sara Rivadulla Bernárdez, Sheila Pouso Ribeiro e Tania Ogando Tilve.

• Premio 4º ESO: Alba Gallego Gil, Eva Mª Míguez Barreiro, Sara Esperante García, Silvana Pena Juncal e Yanira Patiño Fervenza.

• Premio á mellor serie: Clara Gómez Novas e Lucía Núñez Cruz.

No Certame de Fotografía “A Foto Fala”

• 3º Premio 1º ESO: Noa Gago Miranda.

• 2º Premio 1º ESO: Elena Pastoriza Cortizo.

• 1º Premio 1º ESO: Xaquín Fernández Calo.

• 1º Premio 3º ESO: Sabela Cancelas Estévez.

Ademais, entregouse un premio á alumna Clara Gómez Novas, como recoñecemento á súa participación como mestra no Obradoiro de Iniciación á Pandeireta que organizamos no centro polas Letras Galegas.

  Noraboa a todas e todos os participantes!

Premio Micromuseo e Antes de Nós

   O IES Illa de Ons acadou o segundo premio do concurso de microrrelatos audiovisuais Micromuseo, organizado pola Deputación de Pontevedra. A peza audiovisual gañadora titulada Superviventes, baseada en distintas das estampas creadas por Castelao, foi ideada e gravada por un grupo de alumnas de 4º ESO B: Alba Gallego, Eva Míguez, Sara Esperante, Silvana Pena e Yanira Patiño. Noraboa rapazas!

     Por outra banda, onte achegámonos co alumnado de 3º e 4º ESO ata os Multicines Norte de Vigo para ver Antes de Nós, o filme de Ángeles Huerta que supón unha homenaxe a Castelao no 75 aniversario do seu pasamento.

En 1918, Castelao abandona a súa vida estable como funcionario en Pontevedra para enfrontar a pandemia da gripe española como médico no seu Rianxo natal. Anos despois, en 1929, viaxan xuntos por Bretaña, tentando recompoñerse tras a perda do seu único fillo.