I Certame de Fotografía "Obxectivo Bueu"

     O venres 15 de xuño tivo lugar a entrega de diplomas e premios aos autores e autoras das 13 fotografías seleccionadas no I Certame de Fotografía "Obxectivo Bueu": Abel Dopazo (3º PMAR) con dúas fotografías seleccionadas, Iria Villanueva (3º A) con dúas fotografías seleccionadas, María Méndez (3º B) con dúas fotografías seleccionadas, Antía Novas (2º A) con tres fotografías seleccionadas, Iria Rodríguez (1º B) con tres fotografías seleccionadas e Maica Morgado (1º B) cunha fotografía seleccionada.

      
     As imaxes gañadoras ilustrarán un calendario co que o alumnado poderá recadar fondos, o vindeiro curso, para custear distintas saídas educativas propostas polo centro. Os rapaces e rapazas premiados/as asistirán a un Curso de Iniciación Fotográfica na última semana de xuño, impartido por unha fotógrafa profesional.

     A idea de convocar este certame naceu da ANPA do IES Illa de Ons, coa que colaboraron a Biblioteca e o Equipo de Dinamización da Lingua para a creación das bases, a súa promoción e a selección das imaxes gañadoras.

     As seguintes imaxes resumen o acto organizado pola Biblioteca no que María José Arribas, representando á ANPA, participou para facer a entrega dos diplomas.

Concurso de relatos e Certame de Fotografía

    Como xa todas e todos sabedes, no terceiro trimestre deste curso, a Biblioteca e o Equipo de Dinamización da Lingua Galega colaboraron coa ANPA na organización de dous concursos dirixidos ao noso alumnado. 

     O venres 15 de xuño coñeceremos as fotografías gañadoras do I Certame de Fotografía "Obxectivo Bueu", durante un acto no que se fará entrega aos autores e autoras dunha certificación pola súa participación. Os/as premiados/as recibirán, durante a última semana de xuño, un Curso de Iniciación á Fotografía impartido por unha profesional na materia.

     En canto ao I Concurso de Relatos "Teresa López González", os premios fixéronse públicos a finais do mes de maio. O acto foi presentado por Lourdes Garrido, profesora de Lingua e Literatura Castelá e coordinadora do club de lectura, que estivo acompañada para facer a entrega dos premios por Mª José Arribas Portela, representate da ANPA.

       Os alumnos e alumnas premiadas foron:

• Na modalidade A: Andrés Paz (1º B), Zaira Ogando (1º A) e Clara Costas (2º A).
• Na modalidade B: Aarón Santaclara (4º A), Xavier Graña (3º A) e Miguel Leal (3º A).

     A continuación mostrámosvos algúns dos relatos premiados.

Vida de tea

Andrés Paz

     Hai un soño que se repite, que volve e volve, noite a noite. Este soño é:

     Estou co meu irmán facendo un forte de almofadas. Ao entrar a el encontro un coitelo e entro nun mundo máxico feito de mantas e almofadas. Encontrei un pobo, no que os nenos cantaban e os rapaces, adultos e vellos bailaban; pero de pronto apareceu un dragón. Acerqueime e deime conta de que as persoas eran de tea, e o dragón tamén! Leveime unha agradable sorpresa ao descubrir que o lume eran sabas laranxas, así que acerqueime a el, craveille o coitelo, e ao sacalo vexo todo o recheo que sae del, ata que só queda a tea.

     Nese momento quería levantarme do soño, pero non podía! Os nervios apoderáronse de min, sentía que non era capaz de respirar e pensaba que aquilo era real. De repente, noto algo que me toca; eran os aldeáns que me daban as grazas.

     Decidín quedarme, tiven unha muller e dous fillos de almofada. A comida tamén foi de almofada. A min encantábanme as almofadas fritas. A miña muller chamábase Algodón, e os meus fillos Seda e La.

      Ao despertarme foi cando era vello e morría, sempre sentía moita dor, pero  dicíanme: Só foi un soño, pero, e se non foi?

-Avó gustouche o conto?
-Claro, gústanme todos os teus contos.
-Avó...
-Que queres meu fillo?
-Ti vas morrer?
-Pois claro, todos imos morrer.
-Espero que vivas para sempre...
-E eu tamén.

O mundo ten os pés fríos

Clara Costas

     Hai un soño que se repite, que volve e volve, noite a noite. Ese soño recórdame a ese verán, o mellor da miña vida.

     Cada vez que penso nel, vólvome tola. Tan tola que, ás veces non son capaz de recordalo detalle a detalle. Hai veces que quero contarllo á miña nai, pero non consigo contalo ata o final; sempre, cando consigo chegar ao final, dáme vergoña.

     O soño describe o verán perfecto, o que repetiría miles de veces. Prodúceme unha emoción inigualable a outra. A brisa do mar rozando os meus sentimentos, a auga fría, o ceo gris e o meu corazón latexando a mil por hora. Ao meu lado está el, o home da miña vida; e murmúrame ao oído “O mundo ten os pés fríos”.

Aquel terrible pesadelo

Aarón Santaclara

     Hai un soño que se repite, que volve e volve, noite a noite.

     Recordo a miúdo aquela triste historia, a que vivín o 14 de outubro cando espertei nunha casa solitaria do monte. 

     Foi un feito estraño, xa que eu chegara á casa canso e metérame na cama cedo para durmir. Por desgraza non espertei na miña acolledora cama; nun primeiro momento, cavilei na posibilidade de que se tratara dunha broma de mal gusto feita polos meus “amigos”. 

     A casiña na cal se dá inicio o meu pesadelo era antiga, feita con madeira rillada debido ao paso dos anos e ás continuas choivas; carecía de luz, afloraban nunha escuridade constante; dentro de dita escuridade afondeaban diversos cadros que representaban no seu interior escenas de caza. Aínda que había un, só un, que non seguía a mesma temática, aparecía un home aforcado nunha grande árbore que eu coñecía moi ben. 

     Espertei co son do espertador, botei unha ollada pola ventá e alí estaba, a árbore. Tratábase da segunda vez que me vira inmerso naquel sono, á primeira non lle dera importancia pero esta vez si e prometinme acabar con el, de raíz.      

     Cando compramos a casa hai dous anos, ela xa vivía aquí, levaba moito tempo alí prantada. Segundo o home, o que habitaba a casa antes ca nós, prantáraa o seu avó hai noventa e cinco anos. 

     Decidín comezar a miña búsqueda por aquel home, Miguel Santos Fernández, o vendedor. Rebusquei entre os documentos de compra-venda do inmoble, encontrados na librería do cuarto dos meus pais. Saqueinos con coidado e descubrín un burato do tamaño do meu puño. Dentro del, uns documentos que anunciaban o protocolo dos bombeiros tras un incendio da casa supostamente provocado no 1981. Anunciaba tamén o falecemento dun neno de nome Miguel Santos Fernández. 

     Fiquei sentado aproximadamente durante dez segundos, cavilando, discorrendo, calculando, enlazando os meus pensamentos ata que o medo se apoderou de min e corrín e corrín xunto meus pais e alí estaban, tendidos no chan, como durmindo. 

     O meu impulso foi seguir correndo, tropezando en canto había, coa estraña sensación metida no corpo de que algúen me perseguía, cerca, moi cerca. 

     Botei unha mirada atrás e alí estaba, unha figura negra como a noite, correndo con actitude cazadora cara a min, ao instante de volver a mirada adiante choquei, choquei con gran forza contra a árbore, aquela árbore maldita, e quedei inconsciente. 

     Espertei co son do espertador, botei unha ollada pola ventá e alí estaba, a árbore.

 A vida é un soño

Xavier Graña

     Hai un soño que se repite, que volve e volve, noite a noite...

     Son un pobre Fidalgo, Xoán Xosé chamábanme. Vivo na periferia da cidade de Salamanca, nunha vida humilde e sen responsabilidades. Pero todas as noites soño que me converto no rei do país, Filipo III, e teño esa vida de riquezas e satisfacción. 

     Son o rei Filipo III, soberano de España, o que leva unha gran responsabilidade. Estou continuamente mantendo o país entre guerras, relixión e crises, pero gustaríame unha vida tranquila de retiro. Por sorte, todas as noites podo descansar, porque soño coa vida dun humilde Fidalgo sen responsabilidades nin preocupacións.

     Espertei moi tarde hoxe. Levanteime, fun a por unas mazás para almorzar e dirixinme á vila a pasear. Por todas partes víase pobreza, e seica isto pasaba en todas as  cidades do país. Os cidadáns estaban fartos do abuso do rei, que non facía máis que investir os poucos cartos en perseguir os infieis, que ao final eran familiares do pobo. Convocáronme para unha reunión. Nela dixeron que para a semana asaltariamos o Castelo para asasinar o rei. Estaba obrigado a ir, non podía poñerme en contra do meu propio bando, pero a idea do asasinato aterroume. Partimos á mañá seguinte; e eu ía nun carro no que me durmín... 

     Entón espertei subitamente, aterrado polo pesadelo. Parecía tan real... E esa tarde chegou unha caravana de carros cun montón de campesiños armados, e asentáronse fronte ao Castelo. O mellor que podía facer era encerrarme no meu dormitorio a escuras e facer que non estaba. Entón no meu dormitorio entrou Manolo, o meu criado, preocupado pola miña actuación. Eu díxenlle que anunciara ao pobo que ía investir os cartos neles en lugar do exército, para calmalos. E durmín...

     Levanteime á tardiña do día seguinte no carro. Cada vez tardo máis en levantarme! Ao asomarme fóra, o rei anunciara que loitaría contra a crise do pobo, así que o pobo volvía satisfeito e non había mortos. Decidín pasear por Madrid, xa que estaba alí, e entón atopeime o rei de costas, e desmaieime... 

     Espertei da sesta na miña caixa de area, e lambínme a miña patiña. Que soño tan
raro! Ou estaría soñando que era un gato?

Emigrantes - Shaun Tan

A última proposta deste curso para o club de lectura é a novela gráfica Emigrantes, de Shaun Tan.

"Esta atípica e extraordinaria novela gráfica desdebuxa as fronteiras entre a realidade e a fantasía para plasmar a experiencia da emigración. O anónimo emigrante parte dunha realidade coñecida (coa cal o lector se identifica) e chega a un mundo no que, unha vez superadas as fronteiras, todo lle parece (e parécenos) novo e estraño. Ao identificar a patria de acollida cun lugar fantástico, Shaun Tan crea unha sensación de estrañeza, incompresión e fascinación que marca o clímax do libro. A simboloxía adquire unha notoria e sutil presenza, e na narración articúlanse distintas voces que constrúen unha imaxe tan impresionante como próxima da emigración." Reseña de Canal Lector

      Para ir abrindo boca, amosámosvos un proxecto de sonorización da primeira parte da novela, realizado por Tomás Mejía Londoño e musicado cunha Gnossienne de Erik Satie.

     Como actividade complementaria á lectura, a coordinadora do club está a organizar unha excursión a Celanova para visitar, entre outras cousas, a Casa Museo de Manuel Curros Enríquez, unha das figuras máis destacadas da emigración galega.

I Festival Internacional de Jazz de Bueu

     A Asociación de Jazz de Bueu e o Concello de Bueu promoven o I Festival Internacional de Jazz de Bueu, que se celebrará do 7 ao 10 de xuño en diversas localizacións da vila e que incluirá un total de sete actividades. 

     

     A programación arranca o 7 de xuño cun concerto a cargo do Cuarteto do cantante e saxofonista Antonio Otero, que se celebrará ás 21:00 no Farol. Xunto a el estarán Álvaro Vieito á guitarra, Juansi Santomé ao contrabaixo e Antón Iglesias á bateria.

     

     O 8 e o 9 celebraranse dous concertos centrais na Praza Massó con acceso de balde. O venres, a partir das 22:00, será a quenda de JUZZ, a banda liderada polo guitarrista galego Virxilio da Silva acompañado por Rosalino Marinello, Álex Salgueiro, Xan Campos, Felix Barth e Iago Fernández. O sábado, tamén ás 22:00, actuará o saxofonista e cantante Antonio Lizana Group.

     

     No programa tamén se inclúen dúas jam sessions e outras de jazz de mediodía en diversos locais hostaleiros da vila. Felipe Villar Trío actuará o 8 de xuño ás 00:00 no B-Living, coa compañía do contrabaixista José Manuel Díaz e o baterista Max Gómez. O sábado tamén ás 00:00 actuarán no Aturuxo o Cuarteto de Sunil López, unha banda formada por Diego Alonso, Álex Touceda e Héctor Agulla,

    En canto ás sesións de jazz de mediodía, M.G.V. Trío (Miguel González, Brais López e Íñigo Azurmendi) actuará o sábado ás 13:00 no Leña Verde e Pablo Sanmamed Trío, con Iago Mouriño e Bruno Couceiro, o domingo en La Perfecta. 

Regueifeiros e regueifeiras, lumeeeeeee!

     Como xa comentamos a Semana das Letras Galegas, durante o mes de maio desenvolveuse no IES Illa de Ons un Obradoiro de Regueifas. Durante dúas sesións, os días 15 e 28 de maio, o alumnado de 2º ESO aprendeu a compoñer regueifas (composicións cantadas, rimadas e improvisadas), orientados polos regueifeiros Pinto d’Herbón e Luís "O Caruncho". Destas dúas xornadas saíron seleccionados/as sete alumnos e alumnas: Iris Fandiño, Carlos Gómez, Alejandro Rosales, Antía Novas, Sara Soliño, Aridane Moreira e Gisela Pérez, que representaron ao noso centro no II Certame Escolar de Poesía Improvisada do Morrazo o día 31 de maio.

     O certame, que tivo lugar no Auditorio de Cangas, foi organizado polas concellarías de Normalización Lingüística de Moaña, Cangas, Bueu e Vilaboa. Nel participaron os cen finalistas dos diferentes centros do Morrazo e, tras unha primeira quenda, foron seleccionados/as vinte estudantes, entre eles Antía Novas e Aridane Moreira.

   Nesta segunda rolda o xurado, composto por xornalistas, profesorado e profesionais do mundo da música, elixiu os/as catro mellores regueifeiros/as que participaron nunha actuación final, entre eles a Aridane Moreira, alumno do noso centro.

     Noraboa a todos e todas porque non é nada doado improvisar rimas, e moito menos diante de tanto público!

Colaboración da Biblioteca na gravación e edición de vídeos

     O Equipo da Biblioteca colaborou, no terceiro trimestre do curso, na gravación e edición de dous vídeos que resumen dous proxectos levados a cabo no noso centro educativo.

     O primeiro deles, Vis la vie en rose, trátase dun proxecto cooperativo entre os departamentos de Francés e Xeografía e Historia, co fin de optar ao concurso de 20 entradas para acudir a unha das funcións do grupo La Boheme Théâtre o próximo curso escolar. O vídeo, protagonizado por Antía Novas, Sara Soliño e Diana Ogando, resultou gañador deste concurso convocado por BHM Producciones.

    O segundo vídeo resume o proxecto As facianas de Clío, coordinado pola profesora de Xeografía e Historia Diana Vilas, baseado nun eixe cronolóxico no que aparecen personaxes históricos da Idade Moderna distribuídos por distintas zonas xeográficas. Ao enfocar cun iPad as facianas do eixe, estas aparecen en tres dimensións, e contan en primeira persoa feitos importantes da súa vida.
     Para elaborar este proxecto, o alumnado de 3º ESO utilizou varias ferramentas dixitais que lles permitiron dar vida aos personaxes. Coa aplicación Morfo booth crearon os personaxes, para as gravacións de audio utilizaron o Garage Band, o iMovie para as gravacións de vídeo e a realidade aumentada final foi creada coa aplicación HP Reveal, que permite asociar o vídeo do Morfo booth á imaxe do personaxe.

Entrega de premios do concurso de relatos en galego

Xa queda menos para coñecer ao alumnado gañador do concurso de relatos.

VIVA A NOSA LINGUA!

17 DE MAIO, DÍA DAS LETRAS GALEGAS.

     Vídeo poema interpretado polo alumnado de 3º ESO A.

Semana das letras galegas

     A Biblioteca, en colaboración cos departamentos de Lingua Galega e Literatura e o Equipo de Dinamización Lingüística, está a participar en diferentes actividades para celebrar a semana da nosa Lingua.

     Ademais dunha exposición acerca da figura de María Victoria Moreno, sobre a que o noso alumnado está a traballar, faremos lecturas nas aulas de textos da autora e da obra “Doce cartas a María Victoria Moreno” de Ángela Gracián, adquisición recente da biblioteca.

         Por outra banda, o alumnado de 2º ESO está a participar nun Obradoiro de Regueifas impartido polos expertos regueifeiros Pinto d’Herbón e Luís o Caruncho. Nestas dúas sesións seleccionaranse aos alumnos e alumnas que intervirán no Certame de Regueifas do Morrazo o día 31 de maio.

     Para rematar, un aviso ao alumnado que está a participar no concurso de relatos en galego, convocado pola ANPA, Biblioteca e Dinamización Lingüística: AMPLÍASE O PRAZO DE ENTREGA DOS RELATOS ATA O VENRES 18 DE MAIO.

Boa semana a todos/as!

FIC Bueu

Outro ano máis decidimos levar a escola ao cine para ver as mellores creacións dos directores de curtametraxes que participan no Festival Internacional de Curtametraxes de Bueu.

 

            

Manuel Pena, o director do FICBUEU, tivo a amabilidade de facernos unha selección de curtas da última edición coas que, tanto o alumnado de 1º e 2º da ESO coma o profesorado acompañante, desfrutamos contemplando, votando e comentando.

Abaixo tedes información e trailers das curtas visualizadas:

"TIMECODE" (España) de Juanjo Giménez.

 

"TARDE DE PESCA" (España) de Hugo de la Riva.

 

  

"BIG BOOM" (Rusia) de Marat Narimanov.

"LOS HOMBRES DE VERDAD NO LLORAN" (España) de Lucas Castán.

 

"OUR WONDERFUL NARURE. The common chamaleon" (Alemaña) de Tomer Eshed.

   

 "OFF" (Francia) de Thomas Scohy e Kevin Zonnenberg.

"LA INVITACIÓN" (España) de Susana Casares.

Concurso de relatos e certame fotográfico

     A Biblioteca, en colaboración coa ANPA e o Equipo de Dinamización Lingüística do centro, está a promover dous concursos dirixidos ao alumnado do IES Illa de Ons:

• Un concurso de relatos para conmemorar o Día das Letras Galegas e homenaxear a Mª Victoria Moreno.
• Un certame fotográfico co fin de seleccionar unha serie de imaxes que ilustrarán un calendario para o vindeiro curso.

     Aquí tedes os carteis promocionais e as bases dos dous concursos.

TORNEO DE XADREZ

Casa O’Rei

   

     

     A seguinte lectura do Club será a obra teatral Casa O’Rei de Santiago Cortegoso. O autor propón con este texto un xogo escénico a partir do Rei Lear de William Shakespeare, ambientado aquí nunha típica casa de comidas galega.

     Manolo Rei, vello e enfermo, prepara un cocido e reúne a familia. A comida sempre é unha escusa. Desta vez para repartir a casa entre as súas tres fillas. Pero o cocido sáelle cargado de traizón e desprezo, intragable polo amargor dun mundo novo, acedo e descoñecido, que trae do estranxeiro unha morte preconxelada e adobiada con fel. O tempo, o destino e o Burger King son implacables coa sorte dos mortais que non saben seleccionar os ingredientes axeitados para elaborar as receitas da súa vida.

     Ibuprofeno Teatro está actualmente de xira con esta obra teatral. Miguel Borines, Vitoria Teijeiro, Marián Bañobre, Teté García (profesora de música do noso centro), Víctor Mosqueira e Xosé Manuel Esperante, dan vida aos personaxes baixo a dirección de Santiago Cortegoso.

Concursos "Humanísimos"

     Os concursos “Humanísimos” van dirixidos aos estudantes de Secundaria e Bacharelato de toda Galicia e con eles preténdese brindarlles unha oportunidade para coñecer mellor o Campus de Ferrol e as titulacións que ofrece. Así, convócanse certames de monólogos, de fotografía e de microrrelatos, cada un deles nas categorías de ESO e Bacharelato. Nos tres concursos, o prazo de presentación rematará o 31 de maio. 

Concurso de monólogos 

Os monólogos deberán ser orixinais e de creación propia do autor. Comezarán coa frase 

“No meu primeiro día na Universidade…” e terán una duración máxima de cinco minutos.

  

Concurso de microrrelatos 

O relato, dun máximo de 300 palabras,

terá que comezar coa frase “No meu primeiro día na Universidade…”

 Concurso de fotografía de bibliotecas

 Presentarase unha fotografía por concursante e necesariamente 

deberá gardar relación coa temática das bibliotecas.

 

 

SE ESTÁS INTERESADA/O EN PARTICIPAR, 

DESCARGA AQUÍ AS BASES COMPLETAS DOS TRES CONCURSOS

María Reimóndez visita o noso centro

     O alumnado de 1º e 2º ESO leu, o pasado trimestre, a novela xuvenil “Corredora” da autora María Reimóndez. Esta obra literaria trata a historia de Genet Mullugueta, unha nena etíope á que lle encanta correr pola montaña. A fame, a guerra e a figura do pai obrígana a acompañar a súa nai a pedir esmola nas rúas da cidade. Alí coñece a Abebe, un médico e voluntario da federación de atletismo que lle propón adestrarse e cambiar a súa vida por completo.

    Como actividade complementaria á lectura, e en colaboración co Equipo de Dinamización da Lingua Galega, convidamos a María Reimóndez para comentar a obra e falar das súas experiencias co proxecto Implicadas no Desenvolvemento, a ONG galega que fundou en 1998 e da que foi presidenta durante varios anos.
     

XIX Salón do Libro: “Mulleres de conto”

     Desde o 6 ata o 29 de abril, abre as súas portas o Salón do Libro Infantil e Xuvenil no Pazo da Cultura de Pontevedra.

Preme na imaxe para acceder á programación 

     O tema desta edición é MULLERES DE CONTO e con ela o Salón do Libro pretende render merecida homenaxe ás mulleres que conforman o mundo da literatura infantil, desde os personaxes dos contos ata as autoras, editoras, ilustradoras, profesoras, bibliotecarias… e, ao tempo, promover unha lectura crítica e reflexiva, con perspectiva de xénero, ao mundo da creación literaria e plástica da Literatura Infantil e Xuvenil.

Mesa redonda sobre "Maus"

     Os alumnos e alumnas do club de lectura de 4º ESO leron Maus: Relato dun sobrevivente, unha novela gráfica do historietista estadounidense Art Spiegelman na que o autor entrevista ao seu pai acerca das súas experiencias como sobrevivente do Holocausto. Nesta obra as razas humanas represéntanse a través de diferentes tipos de animais: xudeus como ratos, alemáns como gatos e polacos non xudeus como porcos.

     

        A pasada semana tivo lugar na biblioteca do centro unha mesa redonda para comentar a obra. Nela participaron algúns alumnos e alumnas de 4º ESO e Xoán, profesor de Lingua e Literatura Galega. 

Poemas 21 Marzo

     Alejandra Louzao, Antía Piñeiro e Sheila Verde, de 3º ESO, foron as encargadas nesta ocasión de facer a montaxe dos poemas seleccionados polo alumnado, profesorado e persoal non docente para conmemorar o Día da Poesía. Nas imaxes podes ver unha selección de poemas en galego, portugués, éuscaro, castelán, inglés, francés e italiano.

21 de marzo - Día da Poesía

     Para conmemorar o Día da Poesía, o equipo da Bilbioteca propón ao alumnado, profesorado e persoal non docente do IES Illa de Ons a selección e/ou creación de poemas en distintas linguas. Os textos escribiranse dentro de siluetas de globos de cores cos que decoraremos distintos espazos do centro.

Concurso de deseño - PORTADA AXENDA ESCOLAR

GÚSTAME SER MULLER - 8 DE MARZO

     Por que me gusta ser muller? foi a pregunta que serviu de punto de partida a un grupo de alumnas do noso centro para reflexionar sobre diferentes aspectos relacionados co machismo, o trato desigual entre homes e mulleres ou as vantaxes de ser muller.

     Nos seguintes vídeos podedes ver a gravación desta conversa que tivo lugar na biblioteca do centro.

Doogle conmemorativo do nacemento de Gabo

     Tal día como hoxe, o 6 de marzo de 1927, naceu Gabriel José García Márquez, quen despois se convertería en Gabo para os amigos e admiradores. Premio Nobel de Literatura e creador de obras clásicas e imprescindibles como "Cien años de soledad", "El coronel no tiene quien le escriba", "El otoño del patriarca", "Crónica de una muerte anunciada" y "El amor en los tiempos del cólera", Gabriel García Márquez foi un autor universal, protagonista e máximo expoñente do interese do mundo pola literatura hispanoamericana.

     No día de hoxe, Google homenaxea a este grande da literatura cun fermoso doodle* que evoca as paisaxes oníricas de Macondo, o pobo ficticio de "Cien años de soledad", de "Los funerales de la Mamá Grande", de "La hojarasca" o de "Monólogo de Isabel viendo llover en Macondo".

 

* Os doodles son os creativos deseños que a empresa Google utiliza para decorar o seu logotipo base e conmemorar festividades, aniversarios e as vidas de coñecidos persoeiros.

Lectura e dramatización da obra "A rateira"

     O alumnado de 1º ESO que forma parte de club de lectura, acompañado polas coordinadoras do club e da biblioteca, reuniuse na tarde de onte no centro para facer unha actividade de lectura, caracterización e dramatización da obra "A rateira" de Agatha Christie. 

     

     O seguinte vídeo resume esta actividade na que non faltaron risas, sorpresas e unha merendola!

Book trailer "A rateira" de Agatha Christie

     Para motivar ao alumnado en xeral, e ao do club de lectura en particular, a ler a obra "A rateira" de Agatha Christie, o equipo da biblioteca creou este book trailer que foi proxectado hoxe durante o recreo no noso centro.

    
     Os protagonistas son profesores e profesoras do IES Illa de Ons e o responsable da cafetería, aos que queremos agradecer a súa participación e profesionalidade.

Entroido no IES Illa de Ons

GAÑADORES/AS DO CONCURSO DE CARETAS E CABEZUDOS:

CATEGORÍA: MELLOR ELABORACIÓN

1º Premio: León - Iria Rodríguez Iglesias (1º ESO B)

2º Premio: Raposo - David Juncal López (3º ESO B)

3º Premio: Loro - Zaira Ogando Villar (1º ESO A)

4º Premio: Hatsune Miku - Eva ÁLvarez Martínez (1º ESO B)

CATEGORÍA: MÁIS CREATIVA

1º Premio: Cabezudo de cartón - Antía Piñeiro Otero (3º ESO B)

2º Premio: Galiña - Alejandro Entenza Cruz (1º ESO A)

3º Premio: Rinoceronte - Javier Ferradás Loira (3º ESO A)

4º Premio: Amanita Muscaria - Xavier Graña Lobeira (3º ESO A)

CATEGORÍA: ANTIFACES

1º Premio: Veneciana (bufón) - Laura Bernués García (3º ESO A)

2º Premio: Anubis - Breixo Barco Chamadoira (1º ESO B)

3º Premio: Veneciana - Teresa Bernárdez López (3º ESO A)

VI Certame de Relato Curto FANPA

     A FANPA (Federación Provincial de Anpas de Centros Públicos) de Pontevedra bota a andar unha nova edición do Certame de Relato Curto que convoca en colaboración con Kalandraka Editora, e que conta co apoio do Concello de Pontevedra e da Deputación provincial.

    

     Poderán presentarse todos os alumnos e alumnas dos centros públicos da provincia de Pontevedra de primaria, secundaria, bacharelato e formación profesional. Na categoría de adultos poderán participar profesorado e familiares que convivan co alumnado, así como o alumnado matriculado nas facultades dos campus de Pontevedra e Vigo. Cada persoa poderá presentar un relato inédito que conteña entre 200 e 300 palabras que deberá enviar por correo electrónico antes do 28 de febreiro ao enderezo certame.relatocurto@nontedurmas.org.

     Establécense catro categorías –primaria, secundaria, bacharelato e formación profesional, e adultos– e un premio para cada unha dun vale de 200 euros, un lote de libros de Kalandraka, un xogo e unha lámina autenticada polo ilustrador Óscar Villán. Ademais, os 120 finalistas recibirán un libro colectivo cos seus relatos, que incluirá unha historia elaborada expresamente para o certame polo escritor Antonio García Teijeiro. Estes relatos tamén serán publicados polo Diario de Pontevedra durante as vacacións de verán.

     Dos 120 finalistas, o xurado destacará 20 relatos finalistas, entre os que escollerá o gañador de cada categoría, que poderán participar nun obradoiro de creación literaria que impartirá no mes de xuño a escola de escritores da AELG.

LIGAZÓN ÁS BASES COMPLETAS

Novidades Biblioteca 1º trimestre

Exposición Page Tsou - 'Hide-and-seek'

     A Sala de Exposicións do Pazo da Cultura de Pontevedra acolle desde o 7 de decembro e até o 14 de xaneiro a mostra Hide-and-seek [xogo do agocho] do artista Page Tsou (Taiwan, 1978) que exhibe a súa obra en España por segunda vez. A exposición reúne dez proxectos que comprenden máis dun centenar de orixinais do autor taiwanés, coñecido polos seus deliciosos e galardoados libros ilustrados para nenos.

     As obras de Page Tsou son unha fusión de técnicas nas que se poden apreciar influencias do cómic xaponés, da arte urbana e da pintura tradicional oriental.

     A mostra recrea un mundo  onírico, onde as súas mensaxes esconden lecturas diversas —a influencia de René  Magritte está patente en toda a súa obra—. O título da mostra é en si un xogo de palabras: “Gústame debuxar incluíndo sinais ocultos e distintos significados. A maioría das miñas obras son libros ilustrados nos que se tratan certos temas serios envoltos da inocencia e a diversión dos nenos. Esta é a idea principal que reflicte a exposición”, explica  Tsou.

     En torno á mesma e con ánimo de achegar o universo da arte ao público máis novo, celebraranse diferentes obradoiros.

Lecturas e música recomendadas

     A Coordinadora de Equipos de Dinamización Lingüística do Morrazo elaborou as seguintes guías de lectura e música para as vindeiras vacacións. A semana próxima o centro distribuirá entre o noso alumnado as guías impresas de secundaria.

Vídeo actividades 25 N

     En entradas anteriores anunciabamos as diferentes actividades que o noso centro ía levar a cabo para conmemorar o Día da Non Violencia Contra as Mulleres. O seguinte vídeo resume esa xornada na que colaboraron tanto alumnado coma profesorado e persoal non docente do noso centro.

Algúns poemas que as rapazas recitaron:

 

 E Deus fíxome muller de Gioconda Belli 

E Deus fíxome muller,
de cabelo longo,
ollos, nariz e boca de muller.
Con curvas e marcas
e suaves vagoadas
e cavoume por dentro,
fíxome un taller de seres humanos.
Teceu delicadamente os meus nervios
e balanceou con coidado
o número das miñas hormonas.
Compuxo o meu sangue
e inxectoume con ela
para que irrigara
todo o meu corpo;
naceron así as ideas, os soños, o instinto.
Todo o que creou suavemente
a marteladas de soplidos
e taladrazos de amor,
as mil e unha cousas que me fan muller todos os días
polas que me levanto fachendosa
todas as mañás
e bendigo o meu sexo.

Eu de Florbela Espanca

Eu sou a que no mundo anda perdida,

Eu sou a que na vida não tem norte,
Sou a irmã do Sonho, e desta sorte
Sou a crucificada ... a dolorida ...

Sombra de névoa ténue e esvaecida,
E que o destino amargo, triste e forte,
Impele brutalmente para a morte!
Alma de luto sempre incompreendida! ...

Sou aquela que passa e ninguém vê ...
Sou a que chamam triste sem o ser ...
Sou a que chora sem saber porquê ...

Sou talvez a visão que Alguém sonhou,
Alguém que veio ao mundo pra me ver
E que nunca na vida me encontrou! 

 

 

 

Explosión de Delmira Agustini

 

¡Si la vida es amor, bendita sea!
Quiero más vida para amar! Hoy siento
que no valen mil años de la idea
lo que un minuto azul de sentimiento.

Mi corazón moría triste y lento...
Hoy abre en luz como una flor febea.
¡La vida brota como un mar violento
donde la mano del amor golpea!

Hoy partió hacia la noche, triste, fría...
rotas las alas, mi melancolía;
como una vieja mancha de dolor

en la sombra lejana se deslíe...
¡Mi vida toda canta, besa, ríe!
¡Mi vida toda es una boca en flor!