Os alumnos e alumnas de 1º da ESO participaron, a semana pasada, nun encontro organizado na nosa biblioteca con algúns dos refuxiados que actualmente residen en Bueu dentro do programa de acollida xestionado pola ONG Accem.
Durante a actividade, os participantes compartiron co alumnado distintos aspectos e experiencias da súa vida e da súa cultura antes de chegar a Galicia. Falaron dos seus países de orixe, das súas familias, das tradicións que forman parte da súa identidade e dos retos que tiveron que afrontar ao longo do seu camiño.
Para facilitar este intercambio cultural, algúns deles prepararon libros persoais, coma O libro de Dudu e O libro de Amadou, ilustrados con fotografías, mapas, debuxos e relatos. Deste xeito o alumnado puido coñecer mellor os seus lugares de procedencia e descubrir costumes e formas de vida diferentes ás nosas.
As preguntas dos rapaces e rapazas deron lugar a conversas que permitiron derrubar prexuízos e valorar a diversidade cultural. Desde o centro queremos agradecer a Dudu, Amadou e ao resto dos participantes a súa xenerosidade ao compartir as súas vivencias, así como a colaboración de Accem na organización desta actividade.
Ningún comentario:
Publicar un comentario