25 de Novembro

O 25 de novembro, Día Internacional contra a Violencia de Xénero,  fomos invitados polo equipo da Biblioteca do IES Johan Carballeira de Bueu, a participar nunha serie de actividades centradas no rexeitamento da violencia contra as mulleres. Os alumnos e alumnas dos tres centros públicos de Bueu, pintaron as mans de cor laranxa* e estampáronas sobre cartolinas, escribiron frases de apoio ás vítimas e recordaron ás mulleres asasinadas escribindo os seus nomes sobre siluetas de bolboretas*.

* O Día Internacional da Eliminación da Violencia contra a Muller celébrase anualmente o 25 de novembro para denunciar a violencia que se exerce sobre as mulleres en todo o mundo e reclamar políticas en todos os países para a súa erradicación. A convocatoria foi iniciada polo movemento feminista latinoamericano en 1981 en conmemoración á data na que foron asasinadas as irmás Mirabal (Patria, Minerva e María Teresa), tamén coñecidas como As Mirabal ou Bolboretas, en República Dominicana.
* A campaña do Secretario Xeral das Nacións Unidas ÚNETE para pór fin á violencia contra a Muller convida a «pintar o mundo de laranxa», usando así a cor elixida por esta campaña como símbolo dun futuro máis brillante sen violencia.

Ademais deste acto, o alumnado de 3º e 4º ESO participou nun programa de Radio Ons centrado nunha audición musical con cancións referentes á violencia de xénero. José Luís (3º ESO) e Ana, Mila e María (4º ESO) foron os/as encargados/as de levalo a cabo.

O cartel que ambientou o espazo da radio, onde se pode ver unha reprodución do cadro de Picasso "Muller que chora", foi elaborado polo alumnado de 1º ESO A.

Tamén tiveron lugar varias actuacións no salón de actos nas que participaron alumnos e alumnas de 3º e 4º ESO. Poemas, cancións e obras de arte rexeitando a violencia de xénero que emocionaron tanto ao alumnado como ao profesorado.

"O rostro das letras" e Castelao

O 19 de novembro os departamentos de Xeografía e Historia, Lingua Castelá e Literatura e Educación Plástica e Visual, organizaron unha saída a Pontevedra. O alumnado de 3º e 4º da ESO visitou, no Museo de Pontevedra, a exposición "O rostro das letras. Escritores e fotógrafos en España desde o Romanticismo ata a Xeración de 1914" e os fondos sobre Castelao.

A exposición fotográfica representa a diferentes persoeiros como Rosalía de Castro, Valle-Inclán, Manuel Murguía, Eduardo Pondal, Curros Enríquez, Galdós, Baroja, Emilia Pardo Bazán, Unamuno... Todos eles retratados por grandes fotógrafos dos séculos XIX e XX que foron testemuñas dunha época gloriosa da literatura española e galega, como Alfonso, Compañy, Franzen, Juliá, Kaulak, Nicolás Muller, Santos Yubero, Catalá-Roca e Ramón Masats, entre outros.

Nesta mostra reflíctese a evolución do retrato fotográfico desde os primeiros procedementos utilizados (o daguerrotipo e o calotipo) ata o desenvolvemento da prensa ilustrada e o mundo dos reporteiros gráficos. 

Ademais dos primeiros retratos fotográficos e as cartas de visita, os apartados que máis nos chamaron a atención foron os dedicados aos vellos estudos fotográficos, cos decorados e os obxectos cos que os fotógrafos contaban para ambientar as súas fotografías, e o centrado nas tertulias e cafés, onde organizaban as súas reunións os literatos.

Tamén tivemos unha interesante charla didáctica sobre a vida e a obra de Castelao. Descubrimos as súas múltiples facetas: debuxante, pintor, caricaturista, ilustrador, escenógrafo, novelista, médico, etnógrafo, autor teatral, ensaísta, político... A través da ilustración de "Migueliño" coñecemos o relato de Castelao e mesmo fixemos a nosa particular representación.

Aproveitamos a nosa estancia en Pontevedra para facer unha visita guiada polo casco vello. Raquel, a guía turística do Concello, contounos algo de historia da cidade, dalgúns edificios e prazas, as peculiaridades dos nomes dalgunhas rúas, as familias representadas nos escudos das fachadas...

O seguinte vídeo resume esta interesante xornada.

11 de novembro, Día das Librarías

Hoxe, 11 de novembro, celébrase o Día das Librarías. A modo de conmemoración deixámosvos unha escolma dalgunhas das librarías máis fermosas do mundo.

Selexyz Dominicanen (Maastricht-Países Baixos)

 

O Ateneo Grand Splendid (Bos Aires)

 

Cafebrería O Péndulo (Cidade de México)

 

Barter Books (Alnwick, Reino Unido)

 

Altaïr (Barcelona)

 

Lello (Porto)

 

Kid’s Republic (Pekín)

 

Acqua Alta (Venecia)

 

Bardón (Madrid)

 

The Last Bookstore (Os Ánxeles)

II Maratón Fotográfico San Martiño de Bueu

     Mañá celebramos en Bueu o San Martiño. Desde a Biblioteca do IES Illa de Ons queremos animar a toda a Comunidade Educativa a participar no II Maratón Fotográfico, unha das actividades programadas polo Concello. 

   

Temática

     Forman parte da temática do Maratón todas as actividades relacionadas coa festa, así como as tradicións e costumes propias do San Martiño de Bueu. As fotografías presentadas terán que realizarse durante os tres días que comprende o maratón, para o que se programarán dous percorridos fotográficos organizados, un por cada categoría (adulta e infantil/xuvenil, consultar programación). Ademáis disto, as persoas participantes poden facer de xeito libre fotos representativas do San Martiño de toda a actividade en torno ás festas (pasarrúas, eventos relixiosos, comida, verbena, tradicións do outono coma o magosto, xogos tradicionais, etc).

 

Premios e categorías

Categoría adulta (maiores 14 anos)

• Primeiro premio: 150€ + impresión e enmarcado da imaxe + lote entidades colaboradoras
• Segundo Premio: 75€ + impresión e enmarcado da imaxe + lote entidades colaboradoras
• Terceiro Premio: 50€ + impresión e enmarcado da imaxe + lote entidades colaboradoras

Categoría infantil/xuvenil (menores 14 anos)
     Escolleranse as tres mellores fotografías, que recibirán como premio: impresión e enmarcado da imaxe + lote de entidades colaboradoras.
     Selección de fotografías finalistas a maiores das xa premiadas, que pola súa calidade poidan formar parte da exposición organizada con motivo do II Maratón Fotográfico San Martiño de Bueu.

EXPOSICIÓN DE FOTOGRAFÍAS FINALISTAS E GAÑADORAS
Do 19 ao 26 de novembro, en horario de apertura da Praza de Abastos (rúa Montero Ríos, s/n 36930 Bueu).

     O Maratón celebrarase do VENRES 11 AO DOMINGO 13 DE NOVEMBRO ambos inclusive, e os traballos entregaranse ata o LUNS 14 DE NOVEMBRO antes das 00:00h da noite preferiblemente por medios dixitais no formulario web da páxina de ARGO NAVIS, ou fisicamente na sede de Argo Navis en horario de 10:00h a 13:30h e de 16:30h a 20:30h (Montero Ríos nº 57 baixo, 36930 Bueu, Pontevedra).

BASES COMPLETAS E FORMULARIO DE INSCRICIÓN 

Lecturas de terror en Radio Ons

     O pasado venres, co gallo da celebración do Samaín, os equipos da biblioteca e de dinamización lingüística estivemos a ambientar a radio para a retransmisión do programa que terá lugar o día 4 de novembro. Nesta ocasión será o alumnado da materia de Oratoria o encargado de realizar distintas lecturas dramatizadas de terror.

     Para ir abrindo boca podedes premer na seguinte imaxe e escoitar o relato "El corazón delator" de Edgar Allan Poe, autor co que tamén damos comezo ás nosas lecturas do Club.

Gañadores/as do concurso de marcapáxinas

      Xa temos gañadores/as do concurso de marcapáxinas convocado pola biblioteca:

• Diana Ogando (1º ESO A)
• Lucía López (3º ESO A-1)
• Miguel Comedeiro (3º ESO A-2)
• Ana Cortizo (4º ESO A)

     Os traballos premiados, así coma o resto dos deseños presentados polo alumnado dos distintos cursos, formarán parte dunha exposición na biblioteca do centro.

24 DE OUTUBRO - DÍA DA BIBLIOTECA

     Para conmemorar o 24 de outubro, Día da Biblioteca, o equipo da biblioteca convoca un concurso de deseño de marcapáxinas ao que está convidado a participar todo o alumnado do centro. Valorarase fundamentalmente a creatividade e a presentación dos deseños e poderán outorgarse varios premios en función da calidade dos traballos presentados.

     O alumnado poderá facer entrega dos marcapáxinas ao responsable da biblioteca do centro durante os recreos. O prazo de presentación finaliza o luns 24 de outubro.

    Nas seguintes imaxes, con ligazón a páxinas que vos explican como e con que materiais traballar, podedes atopar exemplos de marcapáxinas que vos poden servir de inspiración:

II FEIRA PARA LIBERAR LIBROS

A arte de facer un libro

     Fai non demasiado tempo, os libros imprimíanse un a un, a man. O proceso esixía dedicación, minuciosidade e unha atención ao detalle excepcional, desde o momento no que se armaban as caixas de tipos para logo entintalas e pasar o papel pola prensa, até o proceso de dobrar, alisar e cortar os pregos para coselos, encolalos e encadernalos debidamente.

     No vídeo podes ver todo o proceso de fabricación dun libro:

     As letras de metal colocábanse unha a unha formando as palabras e as liñas. Preparábanse oito páxinas de texto que eran entintadas dun xeito uniforme. Colocábase o papel sobre as "páxinas de metal" e nunha prensa facíase a presión suficiente para estampar o texto entintado. 

     As follas impresas eran pregadas, cortadas, aplanadas nas dobreces e posteriormente cosidas en bandas. O lombo redondeábase e os bordes das páxinas recortábanse para igualar o seu tamaño. Os extremos do lombo eran protexidos e utilizábase unha cuberta de coiro para forrar o libro. Finalmente embelecíase utilizando unha ferramenta de metal quente.

LIbros en castellano

Lectura obras de Manuel María

     O Concello de Bueu súmase este sábado á celebración do DÍA DO LIBRO, polo que organiza unha lectura de obras de Manuel María, ao que este ano se lle dedica o Día das Letras Galegas. Con este motivo quere facer un chamamento á participación do maior número de persoas, alumnado e familias, O acto terá lugar este sábado ás 12 horas na Biblioteca Municipal Torrente Ballester.

Taller sobre "Xornalismo na escola"

O venres día 4, no noso centro impartirase un taller de xornalismo ao alumnado de 3º de ESO e 4º de PDC.
O que impartirá o taller é Víctor Sariego do Colexio de Xornalistas de Galicia.

Guías de lectura para o Nadal

As festas de Nadal e Fin de Ano que están a punto de comezar son unha época típica para a realización de regalos, nomeadamente aos menores da casa. Dentro da múltiple oferta dispoñible, moita xente é partidaria de incluír algún elemento de carácter cultural, aínda que por veces a elección pode resultar complicada.
Nos últimos anos, coñecedores desta situación, os equipos de dinamización lingüística da comarca do Morrazo publican un folleto-guía para dar a coñecer ás familias as últimas novidades no relativo a discos, novelas, cómics, DVD..., co elemento en común de utilizaren todos a lingua galega. Este folleto preséntase dividido por idades para facilitar a localización de materiais acordes ás diferentes idades . Ademais, tamén inclúe un apartado de produtos dirixidos a adultos, pois este tipo de regalos resulta enriquecedor para todos nós.

 Un afectuoso saúdo co noso desexo de que pasen unhas felices festas.

 

Presentación do libro do noso compañeiro Óscar !

O vindeiro venres 4 de decembro dentro da programación do Culturgal (Feira das Industrias Culturais de Galicia, que se celebra no Pazo da Cultura de Pontevedra), terá lugar ás 19.00 h no Espazo foro a presentación do libro "A nenez galega a través dos anteollos de CASTELAO", dos autores: Diana Vilas Meis, Óscar Rodríguez García, Laura Carpente Tielas e Manuel Rodríguez Conde. Colabora: Gabinete didáctico do Museo de Pontevedra. Publica: Deputación de Pontevedra.

CULTURGAL

Culturgal pretende ser unha experiencia única para todas e todos aqueles que participan dela: expositores, artistas, empresas, públicos, etc. A organización de Culturgal sabe que para acadar este obxectivo, o recinto do Pazo da Cultura ten que ofrecer unha serie de servizos que fagan gratificante a visita á gran cita da cultura do país.
Ademais de poder achegarte aos máis de 80 stands dedicados a libro, música, teatro, audiovisual, infantil, tecnoloxía e máis, Culturgal conta cun programa de ao redor de 120 actividades propias durante os 3 días: concertos, espectáculos familiares, encontros con escritores, estreas de filmes e moito máis.
Culturgal 2015, 4, 5 e 6 de decembro, Pazo da Cultura de Pontevedra.
Presume de Culturgal!

 http://culturgal.com/programacion-culturgal-2015/

Conferencia no CEIP MONTEMOGOS.

O colexio Montemogos celebra a 28ª Semana Cultural e Letras Galegas.
 Con este motivo  convida ao profesorado, ás nais e aos pais e ao alumnado de Bueu a asistir á conferencia que o escritor Pedro Feijoo Barreiro (Vigo, 1975) impartirá na biblioteca doCEIP Montemogos en relación co seu libro Os fillos do mar.
 Nesta novela de intriga, finalista do premio Xerais, a trama transcorre en lugares como Vigo ou Bueu. Ao remate o escritor asinará exemplares e poderemos conversar con el.

ENCONTROS DE BIBLIOTECAS ESCOLARES.

 O responsable da biblioteca do noso instituto, Xavier Blanco, asistirá o día 13 de marzo o encontro de bibliotecas que se vai celebrar en Santiago.

(os vindeiros 12 e 13 de marzo terán lugar en Compostela (Palacio de Congresos) os Encontros do Plan de mellora de bibliotecas escolares, unha cita anual do profesorado que coordina e representa aos equipos de bibliotecas escolares dos centros integrados neste programa. No presente curso participan deste Rede de bibliotecas escolares que supón o PLAMBE, un total de 550 centros distribuídos por toda a xeografía do país.  

Coma en anos anteriores, a participación nos encontros será do seguinte xeito:

• 12 de marzo: responsables das bibliotecas dos 33 centros que se incorporaron ao PLAMBE na convocatoria de 2014.
• 13 de marzo: responsables do resto das bibliotecas do PLAMBE ata un total de 550. 

O programa elaborado desde a Asesoría de bibliotecas escolares, en colaboración co CAFI (Servizo de Formación do Profesorado), conta coa presenza de expertos como Casildo Macías (coordinador da Rede de bibliotecas escolares de Extremadura, coautor do Marco de referencia para las bibliotecas escolares- MEC,2011), Ana Garralón (experta e crítica de literatura infantil e xuvenil), Elisa Yuste (consultora con formación e experiencia no ámbito bibliotecario, editorial cultural e educativo), Ana Basterra (Asesora do ámbito socio-lingüístico no Berritzegune -centro de profesores- de Leioa, en Bizkaia, experta en metodoloxía de proxectos). Presentaranse experiencias de bibliotecas escolares de centros que salientan polas súas boas prácticas, e os participantes poderán tamén acudir a unhas reunións temáticas (sobre a formación audiovisual, as apps na biblioteca escolar , a colaboración entre as bibliotecas escolares e coas bibliotecas públicas ou sobre avaliación dos servizos da biblitoeca, entre outras). Poñerá o punto final aos encontros o catedrático de Mediciña Legal da USC, experto internacional en xenética e divulgador científico, Ángel Carracedo, autor do manifesto publicado no pasado novembro, con ocasión do Mes da Ciencia en Galego nas Bibliotecas.) Texto do blog de bibliotecas escolares.

http://www.edu.xunta.es/biblioteca/blog/

Guías de lectura. Decembro 2014

Un bo agasallo no Nadal: libros e música en galego.

GUÍAS DE LECTURA DE SECUNDARIA

 

GUÍAS DE LECTURA DE PRIMARIA 

  

 GUÍAS DE LECTURA DE INFANTIL

MÚSICA PARA FACER AGASALLOS:

LIBRO ONS ONDAS, DOUS.

VÍDEO PRESENTADO NO MUSEO MASSÓ DE BUEU, O DÍA QUE SE DEU A COÑECER O LIBRO ONS ONDAS, DOUS.

XOVES 18 DE SETEMBRO,ÁS 20,30H.NO MUSEO MASSÓ DE BUEU PRESENTACIÓN  DO LIBRO ONS, ONDAS DOUS.

O LIBRO CONTÉN NARRACIÓNS MARIÑEIRAS ESCRITAS POLO ALUMNADO DO IES ILLA DE ONS.

TALLER DE REGUEIFAS CON PINTO DE HERBÓN E O CARUNCHO

O mércores 28 Pinto de Herbón e Luis o Caruncho impartirán un taller de regueifas aos alumnos do centro.





O resultado foi moi bo segundo os comentarios dos alumnos de 3º e 4º da ESO

MARCOS CALVEIRO EN BELUSO

O escritor Marcos Calveiro, autor do libro O pintor do sombreiro de malvas, dará un relatorio sobre esta obra no Salón de Actos do CEIP MONTEMOGOS (Beluso) o vindeiro mércores 28 ás 16:00h. Trátase dunha obra de literatura xuvenil e de adultos, polo que convidamos a participar ao alumnado de Secundaria e ao profesorado .
Outros títulos do autor que temos na nosa biblioteca:

"SETTECENTO"

"CENTAUROS DO NORTE"

"TODOS SOMOS"

Recitado de cantigas

Video Alborada de Rosalía feito entre os centros de ensino do Morrazo

GUÍAS DE LECTURA

Que mellor regalo que facelo  dándolle un libro de agasallo !!!

Culturgal

Venres 29 e sábado 30 de  novembro e domingo 1 de decembro en Pontevedra celebrarase o Culturgal, a feira das industrias culturais galegas, con actividades diversas para todas as idades.
http://culturgal.com/programacion-culturgal-2013/

Primeiro da ESO en busca do conto perdido

A Biblioteca Municipal de Bueu e a editorial Nivola convidáronnos hoxe pola tarde a unha entretida charla na que unha matemaga conseguiu presentarnos xuntos o mundo das narracións tradicionais e o dos números. Tomando como fío condutor unha partida de oca, na que se enfrontaron moi duramente o EQUIPO AZUL contra o EQUIPO AMARELO, entre todos fomos resolvendo as diversas cuestións que nos foron poñendo, sempre sobre os contos de toda a vida: Cincenta, Carapuchiña Vermella, Alicia no País das Marabillas... E asegúrovos que algunha de fácil non tiña nada, sobre todo unha que consistía en acertar unhas claves. Menos mal que deu coa solución certa rapaza de Beluso, que se non algúns aínda estamos agora dándolle voltas á cabeza. Tamén tivo o seu momento estelar Cristian Piñeiro, que tivo que saír diante de todos para escoitar, cos ollos tapados, diversos sons e intentar relacionalos cos seus recordos. Houbo a quen lle parecía moi fácil a cousa pero, claro, cos ollos abertos calquera!

Unha das cousas máis interesantes foi cando se falou dos significados ocultos dos contos. Que se o sangue indicaba falta de pureza, que se referencias sexuais ocultas... Vaia, que eu nunca me fixara en que os contos se podían entender de varias formas. Haberá que ler algún outra vez. Por alí xa había quen estaba disposto! Ao mellor, ata os hai nesa biblioteca: polo menos na sala na que estivemos había un bo montón de libros para a nosa idade. Uns cantos nunca estiveramos alí, pero só con facernos socios podemos levalos prestados para a nosa casa.

Por certo, a partida de oca gañouna o equipo... Vaia, xa non me acordo! Bo, dá igual! O importante é que pasamos unha hora divertida. O peor foi que tivemos que ir e volver á chuvia. Os profes e algúns alumnos levaban paraugas e cazadoras, pero houbo quen pillou unha ben boa.

Visita ao salón do libro de Pontevedra

Este mércores 20 de marzo, para descansarmos un pouquiño de tanto exame seguido, fomos todos os de primeiro ata o Salón do Libro de Pontevedra. A algún o nome parecíalle algo aburrido, pero puidemos entrar nun ordenador xigante, vimos un antiquísimo "camión" de bombeiros, gramófonos, calculadoras "prehistóricas", unha morea de máquinas e engranaxes e ata aprendemos curiosidades sobre a orixe da colocación das letras nos teclados dos ordenadores e dos móbiles. Ah, e fixemos un novo amigo, que sae aquí na foto no momento de chegar a Pontevedra desde a súa casa de Canislupilandia.

Despois viñeron en cirolas Mofa e Befa coa obra Románticos, na que foron desfilando (e facendo monecadas) un montón de escritores desta época: Lord Byron, Mary Shelley co monstro de Frankenstein, Rosalía, Bécquer... Xusto despois fixo a súa aparición o Holandés Errante, surcando os mares do mundo cuns curiosos efectos especiais a base de plástico e ventilador. Ao final, non sei se quedou de todo claro se era máis romántico este mariñeiro eterno ou tomar molladuras indo aos partidos invernais do Racing de Ferrol. Que cadaquén tire a súa conclusión.

A pesar de tanto "traballo", aínda nos quedou algo de tempo para choutar pola Illa das Esculturas e internarse polo seu estreito labirinto.
Crónica: Moisés

Salón do libro

 

Os de primeiro... a toda máquina para Pontevedra! o mércores 20 de marzo.

Desde antigo levan os homes construíndo máquinas que lles faciliten diferentes traballos. Os autobuses lévannos, os guindastres líbrannos de mover pesadas cargas, os móbiles póñennos en contacto coa nosa xente en calquera momento... Mais quen non soñou algún día con dispoñer dalgún trebello tiraburrimentos, outro que nos teletransporte de maneira instantánea ou incluso un que nos cure as feridas se damos un tombo? E un chintófano que nos librase da peluxe de debaixo da cama? Tampouco estaría mal, eh? Veremos, pois, no XIV Salón do Libro de Pontevedra as máquinas que saíron das mentes doutros alumnos que soñaron novas posibilidades, algunhas talvez perfectamente inútiles e outras que quizais nos faciliten a vida. Haberá que descubrilo!

 

E, como o mellor será regresarmos cun sorriso, Mofa e Befa (Evaristo Calvo e Víctor Mosqueira) subiran ao escenario para representar "Románticos", unha comedia sobre o amor total. Aí mesturarán, cunhas cantas cancións polo medio, o conde Drácula con Rosalía de Castro e ata con algún zombi despistado. Ou é que alguén pensou que os mortos viventes non tiñan dereito a amar? Amor e risos para todos, como debe ser!